Studi per nova chasa communala a Casti

A la proxima radunanza communala dals 27 da favrer vegn discutà il studi davart la realisabladad d’ina nov’administraziun da la vischnanca Albula/Alvra. En il rom da la fusiun è vegnì decidì che l’administraziun communala duess esser en il center da la vischnanca a Casti. Il lieu actual dasperas la baselgia sin in mut n’è tenor la vischnanca betg uschè adattà, uschia ch’ins vul fabritgar ina nova chasa communala a la staziun. Il studi davart la realisabladad ed in concept da traffic è vegnì fatg dal biro d’inschigner Hartmann & Monsch SA. Sco ch’igl è da leger en il messadi pudessi dar in bajetg nov cun quatter auzadas là nua ch’actualmain la posta sa chatta. Plinavant pudessi dar in terminal per ils autos da posta. Il buffet da la staziun vegniss destruì ed i dess là ina rundella.

Sco quai ch’il president communal Daniel Albertin ha ditg envers RTR custia mo l’access dal traffic plirs milliuns francs. Uss veglian ins savair da la populaziun sch’ins duess cuntinuar cun il project u tschertgar in’autra soluziun. La via è ina via naziunala ed è uschia en la responsabladad da la confederaziun. Il chantun pudess dentant sustegnair la vischnanca tar las lavurs da projectar. Davart la finanziaziun sto la vischnanca Albula/Alvra contractar cun la confederaziun.

La Credit Suisse ha fatg l’onn passà l’emprima giada dapi il 2014 puspè in gudogn – quai cun reducir custs e ristgs. L’onn da fatschenta 2018 ha la banca gronda Credit Suisse pudì realisar in gudogn net da 2,06 milliuns. L’onn avant aveva ella anc fatg ina perdita da 983 milliuns francs. Ed ils trais onns avant aveva la banca mintgamai fatg perditas da milliardas pervi dad effects spezials. Cun las cifras da gudogn actualas ha la banca superà las spetgas dals analists. Quels avevan spetgà en media in gudogn dad 1,97 milliardas francs.