L’ospital da Tavau vul stritgar 
fin 40 plazzas da lavur

L’ospital da Tavau ha gronds problems finanzials. Per vegnir puspè en las cifras nairas ha la direcziun dal spital mess si in program da sanaziun. Tar quel tutga era la relaschada da 30 fin 40 collavuraturs. Quai ha scrit dacurt la «Südostschweiz». La reducziun dal persunal duai succeder cun agid da midadas ordinarias. Quai ha ditg il landamma da Tavau e president dal cussegl d’administraziun da l’ospital Tarzisius Caviezel, scriva la «Südostschweiz». L’ospital ha scrit ils davos onns mo cifras cotschnas. L’onn 2017 minus 5,1 milliuns. L’onn 2018 fetschian els quint cun in minus da 3,6 milliuns francs. Per l’onn 2019 quintan els anc adina cun ina perdita da var 1,24 milliuns francs. Tenor Caviezel vulan els, grazia a las mesiras da spargn, gia l’onn 2020 puspè scriver cifras nairas.