Mesiraziuns era el Grischun

Da Hans Huonder / anr

La temperatura dalla scheltira permanenta ei carschida ils davos onns sigl entir mund. En ina profunditad da diesch meters munta igl augment ella media 0,3 grads. Pli aultas temperaturas el terren schelau vegnan era constatadas el Grischun. Il studi ch’ei vegnius presentaus dacuort ei vegnius fatgs dalla Reit dalla scheltira permanenta internaziunala GTN-P. Cun agid da ruosnas furadas el terren vegnan datas davart la temperatura ella scheltira permanenta registradas dapi onns sigl entir mund. Grazia alla reit eis ei stau pusseivel da cumparegliar e standardisar quellas. Sin fundament da quellas datas ei vegniu constatau che la temperatura el terren dalla scheltira permanenta ei carschida da 2007 entochen 2016 en 71 da 123 loghens da mesiraziun. En tschun loghens ei la scheltira permanenta schizun luada duront quei temps. En dudisch loghens ei la temperatura el terren sesbassada ed en 40 loghens, denter auter egl ost dil Canada, el sid dall’Eurasia ed ell’Antarctica, eis ella restada constanta. Mesiradas vegnan las temperaturas el terren schelau era el Grischun. Ellas succedan en tschun loghens cun agid da diesch ruosnas furadas, numnadamein sil Pass dil Fliela ed ell’Engiadin’Aulta. La tendenza generala da temperaturas pli aultas tier la scheltira permanenta ei era da constatar ellas Alps svizras ed el Grischun.

Pagina 3