Muntognas nu sun be muntognas

DAD ANNATINA FILLI / ANR

Diversas spassegiadas han manà a Marianne Büttiker in numerus lös particulars da l’Engiadina. Illa quietezza da la natüra ha’la chattà l’access al pled scrit. L’artista Marianne Büttiker ha prelet in venderdi saira i’l Center d’art contemporana Nairs. Dürant sias lungas spassegiadas nun ha’la be ramassà impreschiuns per seis purtrets, ella ha eir chattà l’access al pled scrit. Büttiker s’ha occupada dürant seis sogiuorn da ses mais illa Chasa d’artists a Nairs cul tema da l’aua, da las funtanas e s’ha laschada inspirar da las muntognas da l’Engiadina.

S’occupada cun l’aua

Büttiker ha tut cun sai il public sün sias diversas spassegiadas tras l’Engiadina. «Illas muntognas as bada quant pitschen chi s’es», ha dit l’artista chi abita e lavura ad Aarau. L’on passà ha’la passantà seis seguond sogiuorn a Nairs, ün lö predestinà per s’occupar culla materia aua. Dürant sias spassegiadas ha Büttiker gnü la pussibiltà d’observar la natüra, las funtanas, l’aua chi sbuorfla giò vers la val e las muntognas. «Lapro n’haja realisà cha muntognas nu sun be muntognas, ellas sun ün arrandschamaint da crappa e müdan lur apparentscha schi’s müda la posiziun.» Illa quietezza da la natüra e da Nairs ha imprais Büttiker d’exprimer sias impreschiuns eir cun pleds. Bleras da sias spassegiadas tilla han manada i’l god da Tamangur aintasom la Val S-charl. «Quist lö chi perchüra la lingua rumantscha m’ha inspirada e motivada da notar tuot mias inspiraziuns», ha’la manzunà.

Creatività intensiva

La quietezza, ils müdamaints da las stagiuns e l’inglüminaziun particulara da l’Engiadina Bassa han procurà pro Büttiker per üna creatività intensiva. Seis cumpogns permanents dürant sias spassegiadas d’eiran ün cudaschet da notizchas, ün taila da glin e l’apparat da fotografar. Tuot sias ouvras naschan però pür in l’atelier. Seis purtrets rechamats vegnan cumplettats cun disegns e pittüras. «I capita ch’eu lavur vi da plüssas ouvras al medem mumaint», ha’la declerà, ed: «I po dar ch’eu sun vi dal rechamar e lura am vain adimmaint alch per ün purtret e lura stoja güsta far quai.» In quel mumaint as sainta Büttiker sco ün uffant: «Eu nu resaint lura ingüns pissers, nu n’ha in quel mumaint ingüns pregüdizis e’l sentimaint dal giovar es preschaint.» Per realisar sias ouvras sto ella il prüm as deliberar da las impreschiuns realas. Ella es adüna in movimaint, saja quai pro sias spassegiadas o lura pro la lavur in l’atelier. Büttiker es daspö bundant 12 ons activa sco artista ed ha oriundamaing imprais il manster da disegnadura da textilias. «Fingià da quel temp am fascinaiva da verer co cha’ls muosters naschaivan cun tesser la stoffa. Hoz n’haja precis quel sentimaint pro’l rechamar, pro’l disegnar o pro’l scriver.»

La funtana da la Chalzina

La funtana prediletta da Büttiker es quella da la Chalzina pro Scuol. «Las culuors e’l cling da l’aua plü veglia e da quella plü giuvna in quist lö m’han fascinà», ha dit Büttiker. Landroura es lura nat in l’atelier ün purtret dominà da la culur cotschna e chi muossa il sbuorflar da l’aua in tuot sias fatschettas. L’artista preschainta sül plan terrain dal Center d’art contemporana a Nairs si’exposiziun «Senda d’aua» cullas rechertschas fattas in Engiadina. «L’Engiadina es per mai üna vallada predestinada per perscrutar funtanas chi sun per mai eir ün simbol pel cumanzamaint e la fin», ha declerà Büttiker sias ouvras chi fuorman ün’uschenomnada exposiziun da labor. Las exposiziuns da labor as müdaran quist on regularmaing e düraran per regla trais mais.

L’exposziun «Senda d’aua» i’l Center d’art contemporana a Nairs düra amo fin als 10 da marz. L’exposiziun es averta da gövgia fin dumengia da las 15.00 fin a las 18.00. Ulteriuras infuormaziuns as chatta sülla pagina d’internet

www.nairs.ch