Niev album e concert el vitg nativ

Da Hans Huonder / anr

Gievgia proxima concertescha Marie Louise Werth a Mustér. A quella sera da divertiment ein era d’udir differentas canzuns da siu niev disc cumpact «A breeze of emotions – In ventin d’emoziuns». Il davos solo album da Marie Louise Werth datescha digl onn 2006. El ha purtau il num «Pur’amur». Ussa publichescha la cantadura cun ragischs romontschas in niev disc cumpact suenter ch’ella ha presentau entgins albums novs ils davos onns cun la gruppa Furbaz. Igl ei stau registraziuns cun canzuns d’advent e da Nadal. En in’intervista cun l’Agentura da novitads rumantscha di la musicista: «Il desideri d’anflar in bien mument per saver far puspei inagada enzatgei per mei en fuorma da solo ei gia daditg gronds.» La gronda pissiun da Werth da cantar e sunar ei daventada sia professiun e quei gia avon biars onns. Gievgia proxima sepresenta ella ella Sala Peter Kaiser dalla claustra a Mustér.

Pagina 5