Suenter 13 onns puspei in album niev

Cun Marie Louise Werth ha
Hans Huonder / anr discurriu

«A breeze of emotions – In ventin d’emoziuns» – aschia senumna il niev disc cumpact da Marie Louise Werth. Pliras canzuns da quei album niev ein d’udir al concert che l’interpreta romontscha dat ils 21 da fevrer 2019 ella Sala Peter Kaiser dalla claustra a Mustér. Cun la gruppa Furbaz ei Marie Louise Werth vegnida enconuschenta. Suenter che la gruppa ha giu fatg ina pausa pli liunga ils onns 1990 ei la musicista da professiun ch’ei carschida si a Mustér sefatga sin la via da solo ni era en cooperaziun cun autras formaziuns. Ils davos onns eis ella stada d’udir ell’entira Svizra, denter auter era danovamein culs Furbaz en turneas da Nadal. Werth habitescha dapi biars onns a Sachseln el cantun Sursilvania. Ussa ha ell’ediu in niev disc cumpact.

Marie Louise Werth, tgei ha 
animau Vus d’edir in niev disc 
cumpact?

Marie Louise Werth: Il davos solo album da mei ei stau «Pur’amur» il 2006. Dapi lu ei passau dabia e da tuttas uisas: Registraziuns per discs cumpacts d’affons, in tschuat albums culs Furbaz cun canzuns da Nadal sco era il disc cumpact da «Can You Feel The Swing Tonight» cun la Mountain Swing Big Band e Corsin Tuor. Il desideri d’anflar in bien mument per saver far puspei inagada enzatgei per mei en fuorma da solo schai gia daditg a mi a cor. Obtenend animaziun ed il sustegn 2018 per ina nova producziun davart Beat Müller e Star Productions haiel jeu finalmein nezegiau la caschun.

Co sedifferenziescha quei album da tschels?

Da varga 20 disc cumpacts ei quei il 7avel album da solo da mei. La differenza da quest album visavi ils ulteriurs ei buca sempla da declarar, mo jeu sperel semplamein ch’ei mondi en direcziun sco tier buns vins: Pli vegls, pli madirs e megliers. Serius: En tutta cass ha ei duvrau mintgin da quels albums per vegnir pass per pass vinavon cun memezza tras experimentar, rimnar experientschas ed ughegiar adina puspei empau dapli. La sempla idea da quest album niev cun «pli pauc ei bia gadas dapli» ha lu denton pretendiu nunspitgadamein da mei ualti bia curascha.

Tgei astga igl auditur spitgar da quei album niev?

Gest sco il tetel digl album secloma «A breeze of emotions – In ventin d’emoziuns» cun dapli da Milly: Clavazin e vusch, cun historias ed emoziuns ord la veta da mintga di e meins surcargau cun arranschaments. In sempel e fin album senza grond clamauc, mo zun autentics e delicats e dedicaus a muments meins da prescha e furtina.

Vus essas d’udir savens era sin tribuna, denter auter essas Vus d’udir proximamein a Mustér. Tgei animescha Vus da concertar el vitg nativ?

Far musica, cantar e sunar ei dapi ch’jeu sai seregurdar mia gronda pissiun. Quella pissiun ei denton era daventada mia professiun. Engaschaments e projects ein en quei senn la gronda motivaziun ed animaziun per in e scadin musicist ed artist e gia dapi 30 onns concerteschel jeu cun plascher nua ch’ins dat a mi la caschun leutier. D’astgar dar in concert cun mia band en miu vitg nativ ei stau in’idea spontana da Marcus Weber dil Catrina Experience a Mustér e siu team. Jeu selegrel zun fetg sin ina biala sera cun in publicum svegliau ella Sala Peter Kaiser dalla claustra da Mustér – leu nua che la historia dils Furbaz ha entschiet. Igl ei in liug cun bia emoziuns e leu nua ch’jeu sundel serendida quater onns praticamein mintga venderdis allas quater all’emprova obligatoria da cant sco altista dil chor da students dalla claustra.

Vegnan ils auditurs ad udir a Mustér era tocs dil niev album ed ein las canzuns enconuschentas da Vus e dils Furbaz medemamein d’udir?

Gie, nus vegnin a porscher entginas canzuns ord miu album niev sco era entgins hits e canzuns screttas pils Furbaz. Ensemen cun Heinz Affolter alla ghitara, Beat Ramseier al bass e Greg Baba alla battaria astga igl auditori selegrar sin in vast program en variabels tempis e lungatgs.

Tgei astg’ins spitgar silsuenter da Marie Louise Werth concernent projects novs?

En planisaziun ein ulteriurs concerts en Svizra naven dalla stad vegnenta cul program dad «A breeze of emotions». Era 2019 vegn ei a dar ina turnea da Nadal en formaziun da quintet. Silsuenter vesin nus vinavon tenor il motto: Sperond sin aunc bein entgins buns e bials projects, sche Dieus vul.

Concert «A breeze of emotions» cun Marie Louise Werth e band gievgia, ils 21 da fevrer 2019 allas 19.30 ella Sala Peter Kaiser dalla claustra a Mustér. Reservaziuns ed informaziuns: Catrina Experience 081 929 54 54 ni via

e-mail hotel@catrina-experience.com ni sut info@disentis3000.ch