Cuira: Halla d’ir a chaval tuttina a l’Untere Au?

(rtr) L’emna passada ha la citad da Cuira communitgà: Las contractivas cun la societad d’aczias han fatg naufragi. Uschia sto il project «Eisball» vegnir construì en etappas, cunquai che la halla d’ir a chaval resta fin 2023 a l’Obere Au. Ils chavaltgaders speran tuttina da chattar in nov dachasa a Cuira. La fin finala saja betg stà pussaivel da chattar in cumpromiss. La citad ha ils 17 da december 2018 anc fatg ina ultima proposta. Ils acziunaris da la halla d’ir a chaval avessan survegnì in’indemnisaziun da 300 000 per bandunar l’areal Obere Au sin ils 30 da zercladur 2020. Quai è dentant betg stà d’acceptar. Il risico ch’i vess dentant dà recurs da terzas persunas ed uschia retardà la construcziun, pia betg finì sin zercladur 2020, fiss stà memia grond. Ina soluziun transitorica fiss per la citad stada acceptabla, dentant betg per la SA halla d’ir a chaval. Ma igl n’è dentant anc betg ditg ch’i vegnia tar nagina halla d’ir a chaval a l’Untere Au. La citad da Cuira ha confermà che la parcella a l’Untere Au vegnia scritta or. Cura, gliez stat en las stailas. Cunquai che las contractivas cun la societad d’aczias da la halla d’ir a chaval n’han betg chattà ina soluziun n’è la citad betg pli sut squitsch da temp. La SA halla d’ir a chaval è uss, cunquai che las contractivas han fatg naufragi, in interessent sco tut ils auters per la parcella a l’Untere Au. La SA halla d’ir a chaval spera che quai giaja tant pli spert. Uss èn els sut squitsch da temp. Il contract da dretg da construcziun vala fin l’onn 2023 e sin lura duess ina nova halla star. Hans-Ulrich Bürer conferma er ch’i saja lur giavisch da chattar in lieu a Cuira e la parcella a l’Untere Au saja opziun numer in. Uschia vegnan els er a s’inscriver per la parcella – mo uss èsi pussaivel ch’i dat er auters interessents. E la precedenza che la SA halla d’ir a chaval avess gì cun las contractivas directas cun la citad, lezza è crudada.