«Ei drova ina nov’entschatta»

da Martin Cabalzar

Suenter ina prolungaziun provisoria da dus onns ei igl episcopat d’uestg Vitus Huonder definitivamein a fin cun Pastgas 2019. El vegn a prender dimora egl Institut s. Maria a Wangs ed intermediar da leu anora ils contacts culla fraternitad dils Pius. En ina brev aviarta s’exprima il vicari general dalla Svizra centrala Martin Kopp a moda fetg critica davart la crisa actuala egl uestgiu da Cuera, era en vesta all’installaziun d’in niev uestg. Per el eis ei clar: «La diocesa da Cuera drova ina persunalitad integronta ch’ei habla da far punts e che lai puspei respirar igl uestgiu.» In niev uestg stoppi star sur las fronts e quei buca mo cun bials plaids. Il basegns per ina nov’entschatta seigi immens e Kopp ei perschuadius che la promtadad leutier seigi avon maun tiel pievel da Diu. Il temps dalla polarisaziun seigi vargaus, la baselgia stoppi acceptar la multifariadad e tschercar il dialog. Ei mondi per scaffir confidonza e buca per cumandar e per cementar la pussonza. La baselgia e cun ella igl uestgiu astgien buca pli selubir il luxus da fragmentar vinavon las cuminonzas dils cartents. Ei seigi neras uras che la baselgia muossi ina fatscha pli curteseivla e s’empatschi dapli dils carstgauns, da lur damondas, da lur basegns e da lur quitaus. Da quei avis seigi dil reminent era papa Francestg.

Pagina 2