Cumpromiss raschuneivel 
ni marcau dubius?

da Martin Cabalzar

Dapi onns s’occupa la Svizra adina puspei cun dus problems senza cattar ina soluziun raschuneivla che vess cattau l’acceptanza dil suveran: La taxaziun fiscala dallas interpresas e la finanziaziun dall’AVS. Suenter liungas e vivas discussiuns paran ins ussa tuttina d’haver anflau ina soluziun salomonica. Cun cumbinar las duas propostas per la sligiaziun da dus problems urgents quentan ins quella gada da saver gudignar l’accoglientscha dil suveran. Quei malgrad la critica plitost formala ch’il project dubel cumbinau violeschi il principi dall’unitad dalla materia.

Per sligiar ils problems virulents da nossa tiara drova ei denton magari soluziuns pragmaticas e meins schicanas formalas. La cumbinaziun d’ina descarga finanziala per las interpresas ed il rinforz dall’AVS ei daveras in cumpromiss helvetic per finalmein vegnir in pass anavon en ina situaziun da bloccada. Il project cumbinau scaffescha in’adattaziun urgenta dil dretg fiscal e gida el medem mument a stabilisar la finanziaziun dall’AVS. Silmeins a cuorta vesta, avon che la refuorma AVS 21 per ina refuorma integrala vegni instradada. Quei ei d’interess ton per la cumpetitivitad internaziunala da nossas interpresas e garantescha a nossas senioras ed a nos seniors vinavon in provediment da vegliadetgna sil medem nivel.

Il pachet cumbinau ei ina risposta equilibrada sin dus problems virulents da nies temps. Autras alternativas ein buc avon maun. Da quei ha la finala era l’economia stuiu schar perschuader. Era sche Economiesuisse ha oriundamein buca giavischau la cumbinaziun dil project fiscal culla finanziaziun dall’AVS, sustegn ella uss il cumpromiss acquistaus cun gronda stenta ella debatta parlamentara. Ina soluziun speciala per la Svizra havess consequenzas desastrusas per il beinstar dallas interpresas d’export sin plaun internaziunal e las mesiras da retorsiun fussen probabel grevegiontas e tangassen sensiblamein la cumpetitivitad dallas interpresas svizras, lur forza d’innovaziun ed extensiun fuss restrenschida. Suenter che buca mo l’economia, mobein schizun la Partida populara svizra – ch’ha opponiu el parlament aunc massivamein encunter il project cumbinau – paran ussa la finala d’haver midau meini ein las schanzas per in gie all’urna carschidas marcantamein. Era per munconza d’alternativas valeivlas.

martin.cabalzar@somedia.ch