I mancan magistras e 
magisters rumantschs

Magistras e magisters rumantschs vegnan adina pli stgars. Per franar in zic questa digren organisescha la Scol’auta da pedagogia questa stad in curs per persunas che vulan turnar en la professiun. Pliras vischnancas grischunas rumantschas e talianas han difficultads da chattar e survegnir persunas d’instrucziun per la scolina e la scola primara, cunzunt en l’Engiadina saja quai stgars cun scolastas e scolasts rumantschs, uschia Men Gustin da la Scol’auta da pedagogia. Però er en tschellas regiuns rumantschas na dettia betg blers magisters e magistras. Sin input dals inspecturs porscha la Scol’auta da pedagogia perquai ina scolaziun per levgiar e sustegnair anteriurs scolasts e scolastas da returnar en scola. Ils totalmain 12 dis da curs èn repartids sin l’entir onn da scola. L’entschatta è il fanadur cun in modul da basa da trais fin tschintg dis. Per pudair far il curs dovri almain 10 annunzias.