Carlo Portner, ina fueina da cultura

Muort ina greva malsogna ha Carlo Portner stuiu remetter il presidi dalla Fundaziun en memoria dil cumponist Duri Sialm. El ha adempliu quell’incarica duront otg onns cun gronda survesta e savida, cun plascher e pissiun.

Fundaziun Duri Sialm

Alla fin digl onn 2011 ha Alice Sialm fatg ina fundaziun en regurdientscha da siu bab, il renomau cumponist romontsch Duri Sialm. Quella fundaziun ha la finamira da sustener concerts e representaziuns cun cant romontsch ni cun ovras instrumentalas da cumponists romontschs. Ella sustegn finanzialmein projects che cuostan bia. Il giurist ed advocat Carlo Portner ha interpriu ils pass necessaris per la realisaziun dalla fundaziun. El ha silsuenter er tgamunau il Cussegl da fundaziun, dil qual er Gion Nutegn Stgier ed Arnold Spescha fan part. Els disponan mintg’onn da 10 000 francs che la fundatura metta a disposiziun, els examineschan las damondas inoltradas e decidan davart l’altezia dallas contribuziuns.

Cun plascher e pissiun

Portner ei buca mo staus in excellent giurist, mobein er in um dalla cultura per excellenza, in tratg ch’el ha era demussau sco president dalla Cumissiun per la promoziun dalla cultura dil cantun Grischun e sco president dalla Fundaziun dil Teater da Cuera. El era objectivs ed independents, raschuneivels e gests. Sia moda subtila e differenziada da patertgar e sias vastas enconuschientschas ein stadas da grond’impurtonza per giudicar lavur culturala. El era pretensius e critics; leutier s’aschuntavan denton bia simpatia, beinvulientscha e respect viers quels che s’engaschan sin quei camp.

Portner mava savens a concert ed a teater, assisteva a prelecziuns, visitava exposiziuns ed auters eveniments sil plaun cultural. El leva haver la survesta ed esser informaus da quei che curreva e passava sil camp dalla cultura. Ed el gudeva «quella vivonda spirtala», sco quei ch’el ei s’exprimius inaga. Ei era captivont ed emperneivel da luvrar ensemen cun el. El patertgava e giudicava en moda decidida e clara, mo era cun fin humor. El era collegials e curteseivels. Carlo Portner: in grond purtader e promotur da cultura, in carstgaun che saveva dar impuls, intimar ed entusiasmar, ina vera fueina da cultura.

Alice Sialm, la fundatura dalla Fundaziun Duri Sialm, ils commembers dil Cussegl da fundaziun e biaras persunas activas sil camp dalla cultura engrazian a Portner per siu grond engaschament cultural e giavischan ad el ed a sia dunna Doris bia forza e fidonza enten acceptar e cumpurtar la greva malsogna.

Giusep Quinter, il niev president

Legreivlamein ei Giusep Quinter staus promts da surprender l’incarica da president dalla Fundaziun Duri Sialm. El ei carschius si a Segnas/Mustér, sper la casa dalla famiglia Sialm. Quinter ei era giurist ed unius fermamein cun la cultura. El ha cantau en differents chors, sco per exempel en quel dalla Scola claustrala da Mustér, el chor da giuvenils «Ils Cantins» ed el Chor da baselgia da Segnas ch’el ha era dirigiu entgins onns. El ei commember dalla gruppa dils «Furbazs» e dil «Cantus firmus Surselva». Nus beneventein el en nies gremi e giavischein ad el plascher e satisfacziun en sia nova missiun.

Las damondas per in sustegn finanzial dalla Fundaziun Duri Sialm ein da tarmetter alla adressa suandonta: Fundaziun Duri Sialm; Giusep Quinter, president; Via Sogn Pieder 10;

7013 Domat/Ems

giusep.quinter@bluewin.ch

Arnold Spescha