Ir cun skis ei semidau

(anr/abc) Uonn sa l’Uniun grischuna da skis festivar siu 100avel anniversari. Differents clubs locals han fundau l’uniun tetgala igl october 1919 a Tavau. La finamira fuva clara: Ins leva s’unir per saver promover il sport da skis. En bunamein mintga vischnaunca deva ei gia avon 100 onns clubs da skiunzs. Per saver ir cun skis stuevan ins lu setener ensemen, pertgei ei existeva neginas pistas ed era buca cundrezs da transport. Ins s’entupava las dumengias e mava siadora da cuminonza. Gleiti han ins entschiet ad organisar cuorsas da skis. Per gliez intent stuevan ins smaccar la pista. Quei fuva lavur cumina che s’udeva tier quei sport. Ils 15 da zercladur s’entaupan delegadas e delegai dall’Uniun grischuna da skis a Flem per commemorar il centenari. L’uniun ei il tetg dallas disciplinas alpin, nordic, snowboard e cumbinaziun nordica. Finamira dad oz eis ei da promover la giuventetgna pil sport da prestaziun e selecziunar ils megliers pil cader svizzer e medaglias olimpicas e campiunadis mundials.

Pagina 5