La Svizra vegn 
pli franzosa

En Svizra è sa midada marcantamain la repartiziun da las linguas naziunalas. Entant che pli paucas persunas discurran rumantsch, tudestg e talian, datti dapli persunas che discurran franzos. Quai resulta da l’analisa da l’Uffizi federal da statistica dals onns 1970 fin il 2017. La cumpart da persunas che discurran tudestg è sa reducida entaifer quest temp sin 62,6% (–3%), quella dal talian sin 8,2% (–3%) e quella dal rumantsch sin 0,5% (–0,3%). Il medem temp è s’augmentada la cumpart da persunas che discurran franzos sin 22,9% (+5%).

Tenor l’Uffizi federal d’agricultura è il consum da charn, cumpareglià cun l’onn 2010, sa reducì per chau per 7% l’onn passà. En tut hajan ils detaglists vendì bunamain 218 000 tonnas products da charn. In minus da 4000 tonnas cumpareglià cun l’onn avant. Il 2018 è il terz onn en roda nua ch’il consum da charn è sa reducì. Là è la vendita dal poulet numnadamain s’augmentada per 1,5% sin bunamain 50 000 tonnas. Totalmain è vegnì vendì 5,9% damain charn portg. Era charn vade è vegnida vendida 6,3% damain e charn tschut 6% damain cumpareglià cun l’onn avant.

Il dumber da cunfinaris è sa reducì per 2000 sin 314 000 persunas. Quai è in minus da 0,6% cumpareglià cun l’onn passà. Da quellas 314 000 persunas èn 55% da la Frantscha, 22,4% da l’Italia e 29,2% da la Germania. La cumpart dals cunfinaris è en il Tessin cun 27,3% la pli auta en Svizra. Cunzunt saja il dumber da cunfinaris tudestgs e talians sa reducì. I sa tracta da l’emprima reducziun dapi 20 onns. Ils blers cunfinaris lavuran en il sectur terziar.