Tgi che fa Zazen svida siu tschurvi da tuttas illusiuns (2)
da Daniel Monn
Zazen selai descriver exteriuramein fetg bein. Persunas – vestgidas en ner – avon ina preit alva, sesan tut eri uras ed uras senza semuentar sin in plumatsch.
Pli interessant eis ei da mirar el tschurvi tgei che schabegia leu. La finamira dil Zazen ei da svidar il tschurvi da tuts patratgs. Quei va denton buc senza cumbats. Il tschurvi vul gie adina patertgar zatgei. E tuttina. Als avanzai reussescha ei da reducir la producziun da patratgs. Quell’experientscha vala sco fetg emperneivla ed energetica.
Biars praticheschan Zazen per fugir dil stress quotidian ed anflar sesezs. Denton dat ei buca sulettamein fasas da quietezia e regeneraziun. Zazen sa arver la porta al subcunscient. Quei vul dir che szenarias san inundar il tschurvi sco ei schabegia da notg en siemi. Quellas szenas ein lu aschi realas sco duront in derschalet. Tgi che vegn persequitaus duront in derschalet ha tema e fui, perquei che la tema ei reala. Mo dil pugn da vesta raziunal ei quei gie tut mo in’illusiun. E quella constataziun vala er ella filosofia dil Zen. Tut quei che sepresenta el tschurvi duront far Zazen ei illusiun. La filosofia dil Zen va aschi lunsch e pretenda: Sche perfin Buddha cumparess, lu mazza el.
Jeu hai era fatg regularmein Zazen. Ina ga perfin in’entira jamna! Il tierz di – il di da gronda crisa – sun jeu era staus confruntaus cun in’illusiun ch’ha delectau mei igl emprem mument. Duront far Zazen cumpara tuttenina in bi Jesus en stil baroc. El vegn encunter a mi cun ina hostia. Gl’emprem mument er’jeu tut commuentaus. Sa quei propi esser ver? Ualti spert realiseschel jeu l’illusiun – ed expireschel profundamein e tut ei spariu. Zazen ei radicals e raziunals e vertescha neginas illusiuns. Zazen purifichescha da scadina illusiun, setracta ei da Marias ni da spérts malmunds che neschan en nies tschurvi.
La teopoesia – sco tutta autra poesia – ha da far cun nies entir esser, pia il carnal ed il spirtal. Tgi ch’integrescha sia sensualitad ella spiritualitad anfla ina veta cumplenida e libra da scadina organisaziun.
Gust da leger dapli?