Alla tscherca da successiun

Dad Andreas Cadonau / ANR

Daventar miedi da casa schai buca sisum la gliesta da preferenzas da giuvnas e giuvens miedis. In motiv per ina gruppa independenta da sefatschentar cun il provediment medicinal futur ella Cadi. Els valan sco generalists dalla medischina e per regla ei lur incarica in’incumbensa per la veta ligiada vid il liug da domicil e pratica. Buca gest la megliera basa per carmalar giuvnas e giuvens miedis en regiuns periferas. Tonpli che la Bassa ed ils centers urbans porschan dabia plazzas attractivas e quei che pertucca la medischina da casa engaschi en cuminonzas da praticas. La media da vegliadetgna dils miedis che praticheschan ella Cadi ei medemamein aulta. Quella situaziun ha intimau ina gruppa independenta da sefatschentar cun las structuras ed ils basegns dil futur survetsch medicinal sisum la Surselva. Dalla partida ei il miedi da Trun Martin Tomaschett ed el ha fatg attent alla cumpart carschenta da dunnas ella clamada da miedi ed al basegns per engaschi parzial ella sparta dil provediment medicinal. In engaschi parzial pusseivel per exempel en cuminonzas da praticas. La gruppa che sefatschenta cun il futur dil survetsch medicinal ella Cadi ei gest seformada e vegn pli tard ad informar davart sias finamiras ed enconuschientschas.

pagina 3