Ouvras fich variadas e frais-chas a Sent

DA BENEDICT STECHER / ANR

L’Ensemble Orchestrina Chur ha concertà d’incuort illa baselgia San Lurench a Sent. Els han sunà ouvras da Johann Martin Kraus (1756–1792), da Mario Giovanoli (1953) e da Wolfgang Amadeus Mozart (1756–1791). La baselgia San Lurench a Sent es fich retscherchada per dar concerts da musica da tuot gener impustüt pervi da sia buna acustica. La Società d’Ütil public da Sent survain perquai adüna darcheu dumondas per arrandschamaints musicals. Respunsabla pels concerts illa baselgia es Leta Mosca chi organisescha quels fingià daspö blers ons. Sper concerts han lö illa baselgia eir prelecziuns ed oters arrandschamaints. D’incuort ha concertà a Sent l’Orchestrina Chur & Silberglanz. Els han sunà «l’Ouverture to Olympie» da Johann Martin Kraus, ün’ouvra dominada dad instrumaints a corda ed in möd amabel cun parts fich lommas, ma eir cun fortes. L’ouvra cumpletta da Kraus cumpiglia var 200 cumposiziuns, ouvras sacralas, operas, chanzuns, arias e cantatas per nomnar be ün pêr. Tuot ün oter stil da musica han dudi las audituras e’ls audituors cull’ouvra «Feuer, Erde, Luft und Silber» (prüma rapreschantaziun) da Mario Giovanoli. Argient causa il giubileum d’argient da l’Orchestrina Chur. Pellas musicistas e’ls musicists ün toc fich pretensius cun dissonanzas vuglüdas, ün toc contemporan e pesant. Sco ultima producziun dal concert la «Sinfonia concertante» da Wolfgang Amadeus Mozart. Pro quel toc es l’orchester gnü sustgnü dals solists Flurina Sarott da Scuol, violina, e da Lech Antonio Uszynski, viola, chi han dat al toc üna taimpra tuottafat speciala. Duos profis chi domineschan lur instrumaints in möd surprendent.

Orchestrina Chur daspö il 1994

L’Orchestrina Chur es gnüda fundada dal 1994 sün l’iniziativa d’ün pitschen circul da musicistas e musicists laics, ma eir professiunals. L’orchester s’ha fuormà intuorn Walter Blumer in collavuraziun cul cor da baselgia St. Martin e cul cantor Heinz Gerschweiler. Sper la collavuraziun culla raspada da baselgia sun gnüts organisats eir concerts cun ouvras dal baroc e da la romantica. L’ensemble es gnü manà da principi davent da la maistra da concerts Ruth Michael. L’orchester dombra var 20 commembras e commembers e vain adattà pro lur concerts cun musicists da professiun. Daspö cha l’Orchestrina Chur s’ha distachada da la raspada da baselgia dal 1999 vegnan organisats duos fin trais programs da concert l’on. La collavuraziun dal orchester cun solists professiunals da la regiun spordscha la pussibiltà da’s prodüer in möd solistic. Cun lur lavur ha s-chaffi l’ensemble üna nischa illa vita culturala.

La dirigenta Anita Jehli

Daspö l’on 2012 vain l’orchester manà da la cellista e dirigenta Anita Jehli. Ella ha fat ils stüdis cun l’instrumaint violoncello a la Scoul’ota da musica a Turich, ha ragiunt il diplom da concert cun distincziun ed ha survgni diversas undrentschas. Plü tard ha ella fat ils stüdis a la Scoul’ota d’art cun l’instrumaint cello baroc. Ella suna cun instrumaints nouvs e barocs in diversas fuormaziuns in Svizra, ma eir in l’ulteriura Europa. La dirigenta ha eir fat diversas registraziuns da musica. Ella ha diret il concert a Sent cun segns clers e precis, quai chi nu d’eira simpel causa las differentas ritmicas dals tocs. Il concert a Sent e gnü registrà dal Radio Rumantsch.