Pendiculara tranter Zermatt e Cervinia po vegnir construida

Perquai che la Fundaziun svizra per la protecziun da la cuntrada ha retratg sia protesta po la pendiculara che collia Zermatt e Cervinia en Italia vegnir construida. Las duas partidas hajan suttascrit ina cunvegna che resguardia ils interess dad omaduas partidas a moda adequata. Perquai desista la Fundaziun svizra per la protecziun da la cuntrada d’inoltrar in recurs cunter il project. Las pendicularas da Zermatt èn s’obligadas da promover il turissem da qualitad e ch’i vegn sa depurtà cun respect envers la natira. Plinavant ston las pendicularas demontar la pendiculara da transport tranter Cime Bianche Lagi en Italia ed il Matterhorn pitschen. Ins saja er sa cunvegnì dad integrar meglier l’illuminaziun e la colur da las staziuns en il conturn. Las lavurs per construir la pendiculara da radund 30 milliuns pon cumenzar immediat. En funcziun duai la pendiculara lura ir il 2021. La pendiculara collia l’entir onn l’Italia e Zermatt ed è la pli auta traversa da las Alps.

Curt suenter ses 90avel anniversari è Uriella morta. Quai ha confermà il burgamester da la vischnanca dad Ibach en Germania nua che Uriella era da chasa. En la publicitad n’è Uriella gia onns betg pli passada si. Gia baud ha Uriella tschertgà contact cun la loscha spiertala da Turitg ed er tar sectas en l’Engalterrra ed ils Stadis Unids. Suenter in accident da chavalchar l’onn 1973 ha ella pretendì d’avair gì pliras revelaziuns e visiuns. Ella veseva sa sezza sco portavusch da Dieu. Ad Egg, chantun Turitg, ha ella fundà il 1980 in sanctuari sco center per ses aderents che s’inscuntravan là. Qua è ella lura er l’emprima giada passada si sco «Uriella» en il servetsch da Dieu. Pli tard ha la secta lura midà lieu en Germania, ad Ibach en il Bundesland Baden-Württemberg. L’avust 2012 aveva ses um Icordo confermà ch’Uriella saja schirada. Dapi lura n’è Uriella betg pli stada en la publicitad.