Dameins donaziuns 2018 alla Caritas

(cp) Igl onn vargau ha la Caritas survegniu donaziuns directas egl importo da 30,6 milliuns. Quei ein rodund 3,6 milliuns pli pauc ch’igl onn avon. La raschun persuenter ei ch’ei ha dau dameins entradas tras legats ed igl Agid da catastrofas. Quei ein summas che varieschan dad onn tier onn. Quella reducziun han ins denton saviu ulivar per gronda part tras autras entradas.

Ultra dallas donaziuns directas ha la Caritas survegniu contribuziuns era dalla Cadeina da fortuna (20,6 milliuns), recavs da menaschi (11,9 milliuns) e contribuziuns dil maun public (44,7 milliuns francs). Quella summa ei levamein pli aulta ch’igl onn avon ed ha lubiu da cuntinuar cun ils projects d’agid el rom da tochen ussa. Tut en tut ha ei dau entradas da 107,8 milliuns (onn avon: 108,4 milliuns).

Agid a biars sil mund

En tut ha la Caritas impundiu igl onn vargau 112,9 milliuns. Da quels daners ein 48,5 milliuns i en favur da projects e programs da collaboraziun internaziunala. La Caritas numna en quei connex d.a. igl agid humanitar a fugitivs bandischai dall’uiara en Jordania, Libanon e Siria. Plinavon han ins era dau agid als Rohingyas ch’han stuiu fugir en Bangladesch.

Cumbattiu paupradad en Svizra

En Svizra ha la Caritas promoviu principalmein projects socials egl importo da 46,5 milliuns. El center ei l’integraziun dils pertuccai da pupira e fugitivs stada. Da menziunar en quei connex ein era la cussegliaziun sociala davart deivets sco era las stizuns dalla Caritas. Leu san vischins disavantagiai cumprar quei ch’els basegnan mintga di per prezis pli bass.