«Onn per onn pli paucs – 
l’exempel da la Val Medel»

(rtr) Radiotelevisiun Svizra Rumantscha (RTR) envida a la premiera dal film da Bertilla Giossi. Il film «Onn per onn pli paucs – l’exempel da la Val Medel» raquinta da la depopulaziun en Val Medel, da sperditas, schanzas e curaschi. La premiera ha lieu gievgia, ils 7 da mars 2019 a las 20.00 en la chasa da scola a Curaglia. Suenter il film discurran Rico Tuor, president communal da Medel/Lucmagn, e Stefan Forster dal Center da capricorns, ZHAW, Vargistagn, davart il svilup demografic en las Alps.

L’onn 1965 ha surpiglià il scolast Linus Beeli las classas dal stgalim bass a Curaglia en Val Medel. En l’emprima classa aveva el 25 uffants. Var 50 onns pli tard, dapi l’atun 2017, è la chasa da scola vida. Ils uffants da la Val van or a Mustér a scola, ed er Evelina Giger, la davosa scolasta a Curaglia, va or da la Val a dar scola. Ina sumeglianta sort ha la Societad da musica Medel/Lucmagn. Ils musicants e las musicantas mancan, l’october passà è la societad perquai vegnida schliada.

Era tar la mastergnanza in maletg sumegliant. I mancan lavurers.

Nagina scola, nagina musica, mancanza da lavurers, trais fatgs ch’han tuts trais la medema raschun e consequenza: la depopulaziun. En tut las regiuns rumantschas è la populaziun sa sminuida ils davos onns, ma nagliur uschè ferm sco en la Val Medel. Ils davos 10 onns ha la vischnanca da Medel pers 17% da ses abitants. Oz vivan anc 366 persunas en la Val.

Tge munta questa digren per quellas e quels ch’èn restads? Tge consequenzas ha la depopulaziun per la vita da mintgadi? Co resentan las Medelinas ed ils Medelins lur sort? Respostas en il film realisà da Bertilla Giossi.

Cuntrasts: «Onn per onn pli paucs – l’exempel da la Val Medel »

dumengia, ils 10-03-2019, 17.25 sin SRF 1 (cun suttitels tudestgs) ubain sin rtr.ch/play.

Repetiziuns:

mesemna, ils 13-03-2019, 09.10, 10.10 e las 13.15 sin SRF info

gievgia, ils 14-03-2019, 11.30 sin SRF info

sonda, ils 16-03-2019, 17.15 sin SRF 1