Ralf Seelig daventa nov manader Somedia Production

La Somedia Production survegn in nov manader. Ralf Seelig succeda a Christian Berther ch’ha manà ils ultims passa 30 onns l’agentura da communicaziun da la Somedia. Sco quai che la chasa da medias scriva surpiglia Ralf Seelig il post cun l’entschatta avrigl. El è gia dapi sis onns tar la Somedia ed è responsabel per la chasa editura da la Somedia. Ils ultims onns è el plinavant stà il substitut da Berther. Berther è sa decis da dar giu ses post per pudair passentar dapli temp cun sia famiglia e ses uffants. Suenter in congedi da sis mais duai el puspè turnar en ina nova funcziun tar la Somedia.

La finamira dals socialdemocrats è che nagin sto pajar dapli che 10% da sias entradas disponiblas per la cassa da malsauns. Suttascripziuns per ina tal’iniziativa vul la partida rimnar davent dad immediat, sco ella ha annunzià ier a Berna. Per che nagin stoppia pajar dapli che 10% da sias entradas disponiblas prevesa l’iniziativa ch’ina differenza vegnia gulivada cun reducir las premias. Pajar la reducziun duain tenor la ps la confederaziun per dus terzs ed ils chantuns il rest. Tenor la ps dessi uschia custs da radund 3,6 milliardas francs. Cun l’iniziativa duai dar dapli meds finanzials per pussibilitar da reducir las premias, uschia duain ils assicurads vegnir protegids meglier. La fin schaner hai dà ina sentenzia ch’ha chaschunà lingias grossas. Il Tribunal federal ha obligà il chantun Lucerna da pajar or a millis famiglias retroactiv la reducziun da la premia. Il chantun aveva empruvà da spargnar il 2017 ed ha lura fixà sin in pe memia bass las entradas ch’avessan da bun ina reducziun. La ps dal chantun Lucerna ha lura purtà plant. La chargia entras las premias saja vegnida memia auta per persunas cun entradas bassas u medias, scriva la ps svizra. En media sajan las premias ussa creschidas sin 14% da las entradas disponiblas, quai mussian cifras da l’Uffizi federal per sanadad. Blers perchasas pajan dentant anc dapli, numnadamain 18% fin 20%. 11 chantuns dettian or oz pli pauc per la reducziun da las premias ch’anc avant 10 onns. Quai malgrà il fatg che las premias vegnian adina pli autas. Las premias da las cassas da malsauns èn er in tema tar la pcd. L’october ha la partida lantschà sia iniziativa per franar ils custs. Lezza iniziativa fixescha ch’ils custs per la sanadad e cun quai las premias na possian betg crescher pli ferm che l’economia en general e las pajas. Tenor la pcd pudess ins spargnar uschia sis milliardas francs.

La Svizra e la Gronda Britannia han signà ina cunvegna per garantir als burgais da tschel pajais ils dretgs sco fin qua. Sper il dretg da dimora reglescha la cunvegna nova er ils dretgs en il sectur da l’assicuranza sociala e la renconuschientscha d’examens professiunals. Ils dretgs valan per vita duranta, dentant betg per burgais brits e svizzers ch’emigreschan pir suenter il termin da Brexit en tschel pajais. La cunvegna signada è la tschintgavla tranter ils dus pajais. Gia avant èn vegnidas signadas cunvegnas en il sectur dal commerzi, dal traffic sin via ed aviatica sco er en il sectur dal dretg d’assicuranzas. La fin da 2017 vivevan circa 43 000 Brits en Svizra e circa 35 000 Svizzers en Gronda Britannia. Lez onn è l’insla stada per la branscha d’export svizra il tschintgavel impurtant partenari da commerzi.

Il concern da construcziun Implenia sto puspè magunar in regress dal gudogn. Il 2018 resulta anc in gudogn net da 0,5 milliuns francs cumpareglià cun il gudogn da 39 milliuns in onn avant. E gia lura avevan problems giuridics e mesiras da restructuraziun tar Implenia sminuì il gudogn per in terz. Il segund regress en seria n’è dentant nagina surpraisa. Il pli grond concern da construcziun en Svizra aveva avertì il december passà che problems en las fatschentas en l’exteriur hajan grevas consequenzas finanzialas.

La Svizra ha exportà l’onn passà material da guerra per 510 milliuns francs. Quai èn 14% dapli cumpareglià cun l’onn avant. L’augment saja surtut da declerar cun il fatg che las cifras resguardian da nov er las reparaturas ed ils exports temporars, communitgescha il secretariat statal per economia Seco. Tut en tut han las interpresas d’armaziun svizras exportà rauba da guerra en 64 pajais. Quai cun lubientscha da la confederaziun. Bundand 76% da tut ils exports èn ids en l’Europa. La gronda part da la rauba è ida en Germania, suandà dal Danemarc ed ils Stadis Unids. Il pli bler han ins exportà muniziun, suandà da tancs ed auters vehichels.