Sentupadas cun Tony Nwachukwu

(anr/hh) Il pictur-artist, sculptur, graficher ed autur nigerian Tony Nwachukwu muossa sias ovras il meins da mars 2019 a Cuera, Cazas, Tavau e Glion. En differents loghens dil cantun Grischun prelegia el era ord siu cudisch niev «Die Frau meines Mannes». Tony Nwachukwu ei naschius 1959 el sid dalla Nigeria nua ch’el ei engaschaus aunc oz sco artist e nua ch’el meina ina atgna gallaria d’art. Ils motivs da ses maletgs da batica e sias sculpturas da lenn derivan dil mintgadi african e stattan el camp da tensiun denter cultura veglia e civilisaziun moderna. Puncts essenzials en sia lavur ein era temas religius dil temps avon e suenter la colonialisaziun. Sco autur sefatschenta el en sia nova ediziun da cudischs «Die Frau meines Mannes» surtut dalla situaziun dallas dunnas en Nigeria. Igl ei sia ferma intenziun da procurar che las dunnas survegnien ina nova rolla en connex cun l’Africa che daventa adina pli moderna. Ina part dils daners ord la vendita d’ovras da Nwachukwu va en favur dil project da svilup Mbara Ozioma. Dapi varga diesch onns s’engascha quel per ina migliur persistenta dallas cundiziuns da viver dils habitonts dad Umunumo, ina vischnaunca el sid dalla Nigeria. Cun bia engaschament promovan voluntaris il svilup economic, social ed educativ dalla regiun. Il project Mbara Ozioma ei vegnius eligius dalla baselgia evanelic-reformada dil Grischun sco project da Tschuncheimas 2019–2021.

Exposiziuns:

8–17 da mars 2019 ella baselgia da s. Regula a Cuera (14.00–18.00, ils 10 da mars sulettamein entochen las 15.30).

8–12 da mars 2019 ella «Steinkirche» a Cazas (08.00–12.00 e 14.00–18.00).

13–21 da mars 2019 ella baselgia St. Johann, Tavau-Plaz (08.00–18.00).

19–24 da mars 2019 ella baselgia da s. Margretta a Glion (10.00–17.00).

Arranschaments:

8 da mars 2019: Di d’acziun «communablamein per fermas dunnas – communablamein per in mund gest» cun stan d’informaziun Mbara Ozioma ella biblioteca dil marcau da Cuera dallas 10.00–16.00.

8 da mars 2019: Vernissascha ella baselgia da s. Regula a Cuera allas 18.00.

9 da mars 2019: Luvratori per scolaras e scolars a Tusaun.

10 da mars 2019: Survetsch divin e vernissascha cun risotto ella «Steinkirche» a Cazas.

13 da mars 2019: Luvratori cun scolaras e scolars a Tavau-Plaz.

13 da mars 2019: Prelecziun ella stizun da Claro alla promenada a Tavau-Plaz allas 19.30.

15 da mars 2019: Referat ella stizun da Claro alla Via Neudorf a Tusaun allas 19.30.

17 da mars 2019: Survetsch divin e vernissascha ella baselgia da St. Johann a Tavau-Plaz allas 10.00.

20 da mars 2019: Referat el center dalla pleiv a Grono allas 11.00.

24 da mars 2019: Survetsch divin per giuvenils ella baselgia da s. Margretta a Glion.