Musica da Glion ad Andeer

(cp) Uonn commemorescha la Musica dil marcau da Glion siu 175avel anniversari. Cun siu dirigent Stephan Liver ch’habitescha a Cugin entscheiva ella las festivitads cun in concert ad Andeer. Enteifer l’Uniun grischuna da musica s’audan entginas societads-commembras tiels «semesters vegls». Gia dapi 216 onns exista la Musica da Domat, ell’ei vegnida fundada igl onn 1803. 19 onns pli tard han ins fundau a Cuera la Musica dils cadets dalla scola cantunala, ed in onn pli tard, 1823, entscheiva la historia dalla Societad da musica da Tusaun. En quater onns san ils da Tusaun pia festivar lur giubileum da 200 onns. La fundaziuns han cuntinuau, ina suenter l’autra ein las societads da musica naschidas. 1830 han ils giuvens da Maiavilla fundau ina societad da musica, e sis onns pli tard han ils instruments da stuors resunau l’emprema gada ellas musicas da Glion e da Mustér.

A Glion festivesch’ins uonn il giubileum da 175 onns dapi la fundaziun dalla musica dil marcau. Per la scena da musica da stuors dil Grischun ha quella formaziun specials merets. Ils da Glion han numnadamein envidau all’emprema fiasta da musica. Ils 20 da fenadur 1845, avon 174 onns, ha la gest fundada musica dil marcau organisau l’emprema Fiasta cantunala da musica. A quella fuvan tschun formaziuns separticipadas, numnadamein las societads da Cuera, Tusaun e Glion sco era la «Musica militaris» catolica dalla scola claustrala da Mustér e la Musica dils cadets dalla scola cantunala evangelica grischuna a Cuera. Pér 56 onns pli tard, 1901, ein las societads grischunas denton sedecididas da fundar in’uniun tetgala. Sco quei ch’Arnold Spescha e Raimund Alig scrivan el cudisch ch’ei cumparius il 2001 pil 100avel anniversari dall’Uniun cantunala da musica dil Grischun ei la radunonza da fundaziun stada ils 27 da schaner 1901 a Panaduz. A quella ein 10 uniuns cun 13 delegai separticipadas. A quella radunonza fuva la Musica dil marcau da Glion secapescha era presenta. Quella dad Andeer, fundada 1882, denton buc. Daco ch’ella ha muncau ei buca documentau. La Societad da musica Andeer beneventa en scadin cass ussa sonda, ils 2 da mars 2019 la Musica da Glion en siu vitg. En vesta al giubileum da 175 onns han ils da Glion decidiu da viagiar ad Andeer per presentar leu lur concert giubilar. Quei cun in motiv special: Dapi dus onns diregia numnadamein Stephan Liver dad Andeer la Musica da Glion. El selegra da presentar en siu liug nativ in concert cun «sia» formaziun. La Societad da musica Andeer ha surpriu il patrunadi da quei concert, musicantas e musicants vegnan a menar ustria, l’entrada al concert ei denton libra. Omisduas musicas selegran da beneventar la populaziun da lunsch e da maneivel, dalla Val Schons sco era dallas vals dadens e dadora Viamala e Puntcrap.

Il concert ad Andeer ei sonda, ils 2 da mars allas 20.00, l’entrada ei libra. Dumengia, ils 3 da mars, pil gi internaziunal dils malsauns, delectescha la Musica da Glion duas gadas. Allas 14.00 suna ella all’entrada dil Spital regiunal Surselva ed allas 15.00 porscha ella in concert avon la Casa da vegls e da tgira Glion. Cun quella contribuziun spera la Musica da Glion da saver far in plascher als malsauns e cussadents dalla casa da vegls. Il concert annual ei lu in’jamna pli tard, ils 9 da mars 2019 ella halla da gimnastica a Glion.