Pavlar u betg pavlar selvaschina?

En il Vorarlberg vegn la selvaschina pavlada – en il Grischun percunter è quai in tabu pervi da la tuberculosa. En il Vorarlberg, dentant er en il Tirol e l’Allgäu è la tuberculosa derasada tar la selvaschina. Adina puspè datti er infecziuns tar animals da niz sco per exempel vatgas. En il mender cas pudess la malsogna – entras p. ex. baiver latg – infectar ils carstgauns. In lieu nua che tschiervs pon dar vinavant ad auters animals selvadis la malsogna contagiusa tuberculosa èn per exempel ils plazs da pavlar ch’i dat en il Vorarlberg u en autras regiuns da l’Austria e Germania. Là èsi pussaivel che 80 fin 100 animals selvadis sa rimnan e la malsogna po sa derasar, declera il veterinari chantunal dal Grischun Giochen Bearth. En il Grischun èsi scumandà da pavlar la selvaschina. En regiuns da cunfin cun l’Austria er – per prevegnir che la tuberculosa na cuntanschia betg il Grischun ch’è liber da la tuberculosa. Malgrà che l’Austria ed il Grischun han filosofias differentas saja la collavuraziun cun las autoritads austriacas buna, di il veterinari chantunal dal Grischun. Ins lavuria stretgamain ensemen e saja fitg transparent. Uschia ch’il Grischun è infurmà nua ch’i dat cas da tuberculosa. Actualmain sajan quels plitost concentrads en duas valladas ch’èn in zic pli lunsch davent dal cunfin svizzer. Uschia ch’il privel ch’animals infectads vegnian en il Partenz e dettian vinavant la malsogna saja pli pitschen. Per quest motiv è Bearth optimistic che la tuberculosa na riva il mument betg en il Grischun. Quai na veglia dentant betg dir che la tuberculosa saja en intgins onns betg in tema. La collavuraziun e lavur da prevenziun restia enorm impurtanta. En il Vorarlberg che cunfinescha cun il Grischun vala dentant in’autra filosofia. Per tegnair davent la selvaschina dal guaud da protecziun vegn quella pavlada. Per Hubert Schatz, ecolog da selvaschina en il Vorarlberg, na saja in scumond da pavlar nagin tema. Uschia possian ins controllar meglier la selvaschina ed ella fetschia pli paucs donns en lur guauds da protecziun.