Malans ha gudagnà derby grischun dad unihockey

(rtr) Il derby grischun en ils quartfinals dals playoffs han decidì ils umens da Malans en lur favur. Alligator Malans ha gudagnà la sonda suentermezdi a chasa cunter Cuira Unihockey, quai cun 10:5. Tar las dunnas vegn Piranha Cuira tar ina clera victoria cunter Laupen. En la stagiun regulara avevi dà dus duels tranter Malans e Cuira. Mintgamai l’equipa da chasa aveva gudagnà la partida. Ed uss en l’emprima partida dals quartfinals dals playoffs datti puspè ina victoria per il club da chasa Malans. La proxima partida dals quartfinals tranter Cuira Unihockey ed Alligator Malans è la dumengia saira alas 18.00 a Cuira. Tar las dunnas ha gudagnà Piranha Cuira cleramain l’emprima partida dals quartfinals dals playoffs. A chasa han las unihockeyanas da Cuira battì la squadra da Laupen/Turitg gist cun 9:1. La segunda partida Piranha Cuira cunter l’UHC Laupen è sonda proxima.