Antschet cun perder

(anr/gns) Cun ena tarada ò igl Club da hockey Lai/Valbella scumanzo la runda da promoziun. Pers ò l’equipa orsoura cunter Ascona e chegl cun 5:2. Siva tgi Lai/Valbella ò termino la runda da qualificaziun dalla 3. liga segl sagond plaz è igl team sa qualifitgia per igls gis da promoziun cunter Ascona, Bülach e Samedan. Igl 2018 ò la squadra digl li turistic gia da far igl zap dalla 2. liga ainten la liga pi bassa e chegl siva prest 20 onns. Gio lò era ple u manc cler tgi en onn sessour duess l’equipa danovamaintg turnar ainten la 2. liga, schinavant tgi chegl è ansomma pussebel. Per chel intent ò Lai/Valbella gia da contanscher aint igl campiunadi da hockey 2018/19 dalla 3. liga aglmanc igl sagond plaz, chegl tgi è alloura er sto igl cass.

Blers casteis

Igl amprem gi da promoziun ò la squadra dad Andy Egli giuia cunter Ascona ed alla fegn pers cugl resultat da 5:2. Igls amprems dus terzs èn stos angulivos cun en lev avantatg digls Tessines. Chels on er fatg siva diesch minutas igl 1:0, pero curt sessour ò Dario Lütscher signia igl pari per igls Grischuns. Aint igl terz da mez è crudo angal en gol e chegl per Ascona siva 25 minutas.

Strousch tgi igl davos terz ò scumanzo è reuschia a Nicola Zeller da marcar igl pari per igls giasts. A parteir dalla 51avla minuta anfignen la 56avla minuta on igls Tessines anc fatg treis gols e dus da chels an surdomber cun Lai/Valbella aveir casso casteis gist an seria.