Grondas fuolas als runals – ed ella staziun d’urgenza

(cp) Varga 700 pazientas e pazients ein vegni tgirai duront il meins fevrer 2019 ella staziun d’urgenza dil Spital regiunal Surselva. Ina gronda part da quels cass d’urgenza ei d’attribuir al sport d’unviern. Sper la lavur da mintgadi usitada han era biaras unfrendas dalla grippa fatschentau il persunal dil spital regiunal. Fetg bunas cundiziuns sin pista, dis caulds e suleglivs sco era vacanzas da scola e da sport ella Svizra tudestga ed en parts dalla Tiaratudestga dil sid procuran per numerus hosps els territoris da skis regiunals. Giuven e vegl gaudan mintg’onn el fevrer dis da sport d’unviern grondius ella Surselva. Las aultas frequenzas da visitaders els territoris da skis han era procurau per numerusas unfrendas d’accidents ed aschia era per bia lavur ella staziun d’urgenza dil spital a Glion.

40 entochen 50 pazients 
d’urgenza a di

Las fins d’jamna dil fevrer sco era per part duront l’jamna ha il persunal tgirau intragliauter 40–50 pazientas e pazients d’urgenza a di. En total ha il spital regiunal registrau varga 700 entradas d’urgenza duront quei meins, da quellas ei rodund in tierz vegnius tgiraus sillas staziuns. Quei ault diember da pazients ha pretendiu in grond engaschi e biaras sururas dil persunal dalla staziun d’urgenza, dil persunal da tgira ellas partiziuns sco era dallas miedias e dils miedis. Savens han ins stuiu operar tochen lunsch viaden ella notg, in letg liber sin la staziun da survigilonza era scars.

Treis tochen quater gadas a di ei la Rega sgulada cun unfrendas d’accidents directamein naven dalla pista sil tetg dil spital regiunal. Pli che 80 pazientas e pazients ein vegni transportai il meins vargau cull’ambulanza dil survetsch da salvament dil Spital regiunal Surselva naven dils territoris da skis ella staziun d’urgenza a Glion. Remarcablamein eran da quels pazients circa 70% skiunzs ed in bienton pli paucs snowboardists. La pli gronda part dils pazients d’urgenza ha denton saviu vegnir sezza alla staziun d’urgenza ed ha occupau il persunal oravontut encunter sera tochen viaden ella notg.

Il diember da tractaments d’urgenza corrispunda per gronda part a quel digl onn 2018, igl «onn da record». Tendenzialmein ein dapli pazients vegni tgirai a moda staziunara il fevrer 2019. Il grond diember d’entradas d’urgenza ei serepartius empau meglier ch’igl onn vargau perquei ch’ils cantuns han giu vacanzas da scola duront differentas jamnas. Aschia san ins era declarar pertgei ch’ei ha buca dau dis da record per propi e neginas stretgas da capacitads.

Medemamein sedifferenzieschan ils musters da blessuras dallas unfrendas dil sport da neiv da quels digl onn vargau. Ils emprems meins digl onn 2018 ha ei dau remarcablamein dapli ruttadiras d’ossa dallas giugadiras dalla schanuglia. Ils dus meins vargai perencunter ha il spital regiunal tractau bia ruttadiras dallas giugadiras dalla spatla e dalla claviala. Sco en mintga stagiun da sport d’unviern ha ei era dau numerusas stremblidas dil tschurvi en consequenza da rucladas.

Motivs per las differentas cumulaziuns da blessuras san esser la structura dallas pistas sco era las relaziuns meteorologicas.