Il HCD perda aspectaturs

Il HCD ha pers durant la stagiun passada 9350 aspectaturs. En media han 4307 aspectaturs visità las partidas dal HCD. La NL ha dumbrà per la sisavla giada dapli che dus milliuns aspectaturs.

Il Club da hockey da Tavau ha dumbrà en media 4307 aspectaturs durant la qualificaziun passada. Quai correspunda ad in minus da 374 fans per gieu en cumparaziun cun la stagiun 2017/18. Cun quai ha il HCD registrà il pli grond minus d’aspectaturs da tut ils 12 clubs da la National League. Il pli grond plus d’aspectaturs han ils ZSC Lions registrà (+831), quai malgrà ch’il campiun actual ha giugà ina stagiun mediocra ed ha manchentà a la fin ils playoffs. Ils pli blers aspectaturs ha danovamain l’SC Berna dumbrà (en media 16 290).

La National League sco tala ha per la sisavla giada en l’istorgia dumbrà dapli che dus milliuns aspectaturs durant la qualificaziun. Exact 2 088 688 aspectaturs han las 300 partidas da hockey attratg, quai che munta en media 6949 fans per gieu. Sulettamain en la stagiun 2015/2016 avevan dapli aspectaturs visità las partidas da qualificaziun en la pli auta liga svizra.

La Swisscom ed auters furniturs d’access internet na duain betg vegnir obligads d’annunziar pornografia scumandada a l’Uffizi federal da polizia. Tenor il cussegl naziunal na saja quai betg l’incumbensa da las interpresas da telecommunicaziun. In’autra dumonda centrala da la revisiun da la lescha da telecommunicaziun è la neutralitad da la rait. Auter che tar la pornografia scumandada suonda la chombra gronda qua per gronda part il cussegl dals chantuns e vul lubir als furniturs da porscher servetschs spezials sco per exempel televisiun via internet. La qualitad da servetschs d’autras interpresas, per exempel da plattafurmas da videos e serias, na dastga dentant betg vegnir restrenschida.