Petiziun per liberalisar il celibat

(cp) Sco quei che FM1Today, in’interpresa da medias a S. Gagl, rapporta tras Dario Cantieni va ei vess a Florentina Camartin, Breil, da rimnar suttascripziuns per sia petiziun da liberalisar il celibat. Paucas jamnas avon ch’il termin scadi ei la bilanza cun suttascripziuns per la petiziun menziunada buca cuntenteivla. Mo per Florentina Camartin, ch’ha lantschau quella petiziun igl atun vargau suenter che sur Marcel Köhle veva stuiu seretrer muort carezia tier ina dunna sco plevon da Breil, ei quei resultat tuttavia buc in mussament ch’ei drovi buc ina tala petiziun.

Silpli 5000 suttascripziuns

Gest suenter la lantschada ha ei dau biars ch’han suttascret perquei che la pleiv da Breil veva piars siu zun preziau plevon. Mo cul temps ha igl interess per la petiziun schau suenter. Entochen oz ein 4600 suttascripziuns vegnidas rimnadas. Bein ina cefra impressiunonta. Mo sch’ins patratgi ch’ins seigi vegnius da rimnar gia ils emprems pèr dis entuorn 2000 suttascripziuns seigi il diember contonschiu pli pigns che spitgau. Ins quenta la finala cun rodund 5000 suttascripziuns. La glieud ei dil meini – tenor Camartin – ch’ei nezegi tuttina nuot da far enzatgei en quella caussa ed ella sedistanzieschi dalla baselgia. Sche negin s’empatschi dalla baselgia sappi quella esser dalla perschuasiun che quei ch’ella fetschi seigi endretg. Il problem seigi quel «che quels che patratgien» bandunien la baselgia. Quei schabegi lu cu il pievel vegni buca pli prius serius.

Trumpada che buca dapli spirituals han suttascret

Malgrad ch’il diember da suttascripziuns per la petiziun seigi mudests vegn Camartin a surdar la gliesta cun las suttascripziuns al papa. Lu sefetschi quel en che zatgei cuori ella societad. Trumpada eis ella da quels spirituals pensiunai ch’hagien igl emprem detg da vuler suttascriver, mo hagien lu tuttina buca fatg ei. Quei seigi donn, essend che mintga spiritual activ sappi viver aunc dad el anora il celibat. Mo sche quel vegn sfurzaus si sappi quei ver nauschas consequenzas. Il celibat sappi frustrar giuvens spirituals, isolar els e sut circumstanzias schizun catschar els en in regl, sco p. ex. cun sesurdar el zuppau agl alcohol ni sai jeu tgei. Aschi sogns ein ins lu tuttina buca pli. Camartin tschenta la damonda schebein la rimnada da suttascripziuns per la petiziun vegni insumma a muentar enzatgei. Quei vegni a semussar sch’ei vegni aunc vitier ils proxims dis zacontas suttascripziuns.