Bab e fegl candideschan

DA GION NUTEGN STGIER / ANR

Las persungas tgi la Parteida liberaldemocratica digl Grischun (pld) ò nomino per las elecziuns digl cunsegl naziunal èn ancunaschaintas. Dus da chellas diesch èn Andreas Züllig e Nico Züllig da Lai. Igls 20 d’otgover 2019 eligia igl suveran svizzer represchentants e represchentantas pigl cunsegl naziunal e pigl cunsegl digls cantuns. Chegl vala er pigl Grischun tgi ò da reeliger u eliger da nov las persungas tgi represchaintan igls proxims quatter onns igl cantun ainten la tgesa federala. Singulas parteidas grischunas on gio fatg las nominaziuns ed otras suondan proximamaintg. Tar egna da chellas tgi ò gio fatg las nominaziuns totga la pld, vot deir igls liberals da noss cantun. A Flem on els preschento las diesch persungas tgi duessan far tantas vouschs scu pussebel per tgi la pld da noss cantun seia siva dallas elecziuns federalas 2019 puspe represchentada ainten la tgombra pitschna a Berna. Igl 2011 veva la pld grischuna pers igl mandat da Tarzisius Caviezel aint igl cunsegl naziunal er cun renunztgier ad ena colliaziun da glistas cun las otras parteidas burghesas.

Gio sto eneda candidat

A parteir digls 20 d’otgover 2019 duess chegl sa midar per igls liberals digl Grischun cun els gudagner anavos chel sez pers avant otg onns. Egn digls tschintg candidats e candidatas dalla glista principala dalla pld è Andreas Züllig, igl president digls hoteliers svizzers e hospitant digl hotel Schweizerhof a Lai. El veva gio candido igls 2011 pigl cunsegl naziunal, dantant sainza success. Igl 2015 ò Andy Züllig renunztgia ad ena candidatura per chel mandat federal cun esser nia eligia igl november 2014 scu peresident da Hotelleriesuisse.

Turissem ed agricultura

Andreas Züllig ò 61 onns, è hotelier cun corp ed olma ed appartigna er a ples gremis turistics e dall’economia scu per exaimpel alla suprastanza da Grischun Vacanzas, Economiesuisse ed agl Forum d’economia grischun. Ultra da chegl fò Andreas Züllig er part agl cunsegl d’administraziun dalla Scola da hotel SSTH Passugg. El dei tgi pigl Grischun ed er per la Svizra seia ena veia communabla da grond’impurtanza. A Berna less el s’angascher per en ferm turissem, per ena buna agricultura e cunzont er per ena miglra furmaziun. Per mintga impressari e per mintga persunga tgi magna en affar dovrigl er daple libertad e pi paca birocrazeia. Andreas Züllig dei tgi el seia per ena politica da clima credibla e cunzont er per tgirar e mantigneir la nateira intacta. Cun el candideschan anc per la pld Anna Giacometti, Vera Stiffler, Michael Pfäffli e Martin Bundi. Da supponer è tgi las miglras tgertas da far igl zap a Berna on digls liberals grischuns Andreas Züllig ed Anna Giacometti, la presidenta communala dalla vischnanca Bregaglia.

Per la forza hidraulica

Sen la glista digls liberals giovens figurescha cun Nico Züllig er en mat da nossa regiun. Igl è bagn singular tgi er el candidescha dasper sies bab Andy Züllig per la pld grischuna pigl cunsegl naziunal. Igl expert da gastronomia e giurist d’economia ò 25 onns ed è da preschaint co-president digls liberals giovens da noss cantun. Politicamaintg s’angascha Nico Züllig per ena ferma economia aint igl Grischun e cunzont er per bunas cundiziuns da basa per affars masangs e pitschens. Igl Grischun seia en cantun cun en immens potenzial per fundar novas interpresas e firmas innovativas. Per tgi chegl seia ansomma pussebel dovrigl urgent leschas pi pac strantgas e per en po pi pacas prescripziuns ed ordinaziuns davart digl stadi e digl cantun. Nico Züllig menziunescha tgi dovra er l’energeia regenerabla, dantant pigl Grischun seia la forza hidraulica er da fitg gronda muntada. El punctuescha tgi la dretga soluziun seia an mintga cass en tschains d’ava flexibel. Igl om da 25 onns manegia er tgi mintgign vegia igl dretg d’aveir ena buna furmaziun generala ed er an chella tgossa viglia el s’anagscher pi fitg.