L’auto mellen surpiglia la lavur dal tren cotschen

Cun l’auto da posta tras l’Engiadina Bassa empè da la Viafier retica. Dals 11 da mars enfin ils 7 da settember resta il tren en la staziun. Gist sis plazzas da fabrica prevesa la Viafier retica da realisar durant la stad 2019. A Lavin e Sagliains è previs d’adattar l’infrastructura als basegns actuals. Differents tunnels e punts vegnan renovads ed er ils binaris vegnan per part remplazzads. Gist 12 novs chauffeurs fai da basegn per circular mintga di tranter Scuol e Susch ed ulteriurs tschintg autos da posta ston star pronts per substituir la Viafier retica durant la stad. La firma AutoDaPosta ha engaschà chauffeurs, oravant tut da la Bassa, ma era singuls indigens ch’èn pronts da s’engaschar a temp parzial. Era suenter il brischament dal schaner da quest onn, nua che 20 autos da posta èn brischads a Cuira, ha la firma avunda autos per ademplir l’incumbensa. Trais ulteriurs curs en previs per vegnir a temp cun ils passagiers tranter Scuol e Susch. Da quels directs che van da Scuol enfin Susch per manar ils giasts sin il Veraina u en direcziun Engiadin’Ota e da quels che van da vitg a vitg.

Sin las autostradas vallesanas na datti nagina emprova cun tempo 140. Il cussegl grond dal Vallais ha refusà cun 79 cunter 41 vuschs in postulat d’in deputà da la pps. Ils adversaris han argumentà ch’il viadi da Martigny a Sion vegniss duas minutas pli curt – entant ch’i duvrass 30% dapli carburant. Per il project da pilot da tempo 140 sin las autostradas vallesanas eran cunzunt deputads da la pps e da la pld.

Tar las Viafiers federalas svizras (VFF) duai vegnir introducì da nov ina terza classa. Quai recumonda in studi ch’è vegnì fatg per incumbensa da l’Uffizi federal per traffic, sco la NZZ am Sonntag rapporta. La terza classa fiss previsa per clientella cun pitschen budget e vala sco cumbat cunter bus a distanza, Uber ed electro-mobils. Ils auturs pensan ad ina sort «Easyjet» sin rodaglias. Ils sezs duain esser pli datiers in a l’auter ed ins duai seser sin tschintg plaz per retscha. Las reacziuns davart las Viafiers federalas svizras èn reservadas. Tenor l’uniun per traffic public na portia ina terza classa strusch potenzial da spargn. Persuenter rendia ella il traffic public anc pli cumplitgà. La branscha ha mess sin bigliets da spargn durant las uras marginalas. Ed els han annunzià da betg auzar ils pretschs per 2020. Dal tuttafatg nova na fiss la terza classa betg. Fin 1956 era ils trens da las Viafiers federalas svizras gia stadas per via cun terzas classas.

Tenor il nov rapport da l’OECD, l’organisaziun da cooperaziun e svilup economic en Europa, datti bleras refurmas, dentant vai mo plaun vinavant cun l’egualitad tranter um e dunna. Il nov rapport da l’OECD mussa che dunnas vegnan anc adina discriminadas en blers pajais. Tenor il rapport da l’OECD che ha intercurrì e cumpareglià la situaziun en 180 pajais vegnan las pli bleras dunnas discriminadas en lur atgnas famiglias. 75% da tut las dunnas lavuran a chasa u tgiran ils uffants senza paja. En 27 dals pajais ston dunnas far per cumond als umens. Uschia èsi er scumandà en 24 pajais a dunnas dad ir a lavurar senza la lubientscha da l’um. En bun la mesadad dals pajais datti professiuns che sulettamain umens dastgan far.