Per l’emprema ga 
cul dirigent Peter Werlen

(anr/hh) Dils 23 entochen ils 31 da mars 2019 sepresenta il Chor dil gimnasi da Mustér a Trun, Cuera, Andermatt e Turitg. Per l’emprema ga eis el sin turnea da concerts cul dirigent Peter Werlen. La musica ei ina part essenziala dalla historia da 1400 onns dalla claustra da Mustér. La musica vegn tgirada leu sin in fetg ault nivel e per quei motiv fa ei era buca surstar ch’il chor dil gimnasi s’auda tiels megliers da siu gener en Svizra. El ei bein enconuschents per sias premaudiziuns e turneas da concert. La collaboraziun cun musicistas e musicists da renum internaziunal porscha la caschun da sesarver per novs horizonts. Damai ch’igl intern dalla baselgia claustrala vegn restauraus cumpleinamein il mument e che la baselgia stat a disposiziun pér naven da s. Martin quest atun entscheiva la turnea a Trun. Quei ei gia stau aschia igl onn vargau.

110 cantadur(a)s

Il Chor dil gimnasi ed internat dalla claustra da Mustér secumpona da 110 cantaduras e cantadurs e s’auda tiels pli enconuschents chors da scola en Svizra. Avon quater onns eis el vegnius distinguius cul Premi Lily Wäckerlin. Sper gronds concerts en collaboraziun cun la scola s’audan la turnea da concerts annuala e la cooperaziun tier survetschs divins tiels pensums principals dil chor. Las emprovas vegnan arranschadas mintga jamna duront il temps da scola. Il gimnasi a Mustér dat peisa ad ina formaziun cumplessiva e dat al chor in accent special. Aschia ein tuttas scolaras e tuts scolars che disponan d’ina buna vusch naven digl emprem di da scola entochen tier la matura engaschai el chor. Per els secapescha quei da sesez ed ei ina bial’obligaziun. Dapi la stad 2018 ei Peter Werlen dirigent e menader dil chor. Suenter il studi all’Academia per musica da scola e da baselgia a Lucerna ha el menau plirs chors. El ei staus fundatur dalla Scola da cant Valleis-su ed ei staus engaschaus sco scolast per direcziun da chor alla Scola da musica Valleis-su. Il medem mument eis el staus occupaus sco dirigent hospitont. Dasperas ha el menau jamnas da chor en Svizra ed egl exteriur. Denteren eis el seperfecziunaus en direcziun da chor cun cuors da meister tier Laszlo Heltay (GB) e Kirk Trevor (USA). El ha dirigiu plirs chors tschecs, denter auter la «Nordböhmische Philharmonie Teplice». El ha cooperau cun plirs chors egl exteriur e formaziuns da renum internaziunal. Sper siu engaschament sco dirigent dil Chor dil gimnasi da Mustér eis el era engaschaus il mument tier la Camerata Walchwil, il Chor-baselgia Walchwil ed il Chor XANG a Zug.

Duas solistas

Era uonn sepresentan persunalitads ord il mund dalla musica communablamein cul chor. Bein enconuschenta sco cooperatura dils concerts dil chor ei Letizia Scherrer, oriunda da Trun. La sopranista ha studegiau al Conservatori a Sogn Pieder (Feldkirch), silsuenter a Turitg e la fin finala all’Academia Samuel-Rubinstein a Tel Aviv ed alla Scol’aulta per musica a Basilea. La pianista Praxedis Geneviève Hug ha entschiet a sunar cun tschun onns. Gia baul ha ella survegniu impurtonts impuls musicals da differents magisters. Suenter il studi da musica en Svizra ha ella giu la caschun da studegiar all’enconuschenta Academia Pianistica «Incontri col Maestri» ad Imola. Hug ha recaltgau ils davos onns in excellent num ella scena dalla musica internaziunala. Sustenida vegn la turnea da concerts digl Orchester Desertina che secumpona da buns enconuschents dil dirigent e dalla claustra e che derivan per part digl exteriur. Els s’entaupan regularmein a Mustér per ils concerts duront il temps da cureisma ni per la fiasta da s. Placi e s. Sigisbert.

Interessantas ovras

Alla 47avla turnea da concerts presenta il Chor dil gimnasi ed internat dalla claustra da Mustér igl «Eternal Light – A Requiem» da Howard Goodall. Quel ei vegnius screts sin incarica dil London Musici cun occasiun da siu giubileum da 20 onns digl orchester. La premaudiziun ha giu liug il november 2008. Goodall, in cumponist brit, ei enconuschents per musicals, musica sacrala e musica da film. Enconuschents eis el vegnius sco cumponist dil tetel dalla seria da films da «Mr. Bean». Sias ovras sacralas tonschan d’intonaziuns da psalm sur cumposiziuns da chorals entochen al requiem. Igl onn 2009 ei Goodall vegnius nominaus pil premi da musica brit «Composer of the Year» ed ha gudignau quel per si’ovra «Eternal Light – A Requiem». In «Emmy» ha el obteniu per sia musica dil film «Blut, Schweiss und Tränen».

Turnea da concerts: 23 da mars 2019 allas 17.00 ella baselgia da s. Martin a Trun; 24 da mars 2019 allas 17.00 ella baselgia dalla s. Crusch a Cuera; 30 da mars 2019 allas 18.00 ella baselgia parochiala da s. Paul ad Andermatt; 31 da mars 2019 ella baselgia da s. Francestg a Turitg.