Sgola schibetta sgola

(anr/ac) Sil pli tard enaquella ch’ils buobs da scola lain resunar «Schibettas, schibettas» ei la populaziun da Danis-Tavanasa en pei. Il trer schibettas mintgamai l’emprema sonda da cureisma ei ina fiasta dil vitg che lai reviver regurdientschas. Il til cun tizuns dalla buobanaglia viers Chistatscha appartegn al vegl usit dallas schibettas da Danis-Tavanasa. Il trer schibettas, lantschaus dalla messa en baselgia da Danis, suonda ad in clar script. Gl’emprem camina la buobanaglia dalla spunda siado e tegn lur schibettas el fiug entochen ch’ellas fan burnida. Suenter suondan ils giuvens ed ils tscherchels cotschens ella notg tradeschan il moviment corporal necessari per dar slontsch e schar sgular la schibetta ella notg accumpignada dil clom che dedichescha la schibetta alla giuvna preferida. In bi sgol dalla schibetta ella notg ei dependents da plirs facturs, igl inschign da trer, il vent, la humiditad dall’aria, la schibetta sezza ed in liung sgol vala per buna enzenna dil destin. Las mattas possedan medemamein in’incumbensa enteifer il trer schibettas, numnadamein da cuschinar patlaunas per ils mats che tuornan dil cuolm. Sco ei para ei igl entusiassem dallas mattas da giugar lur part enteifer il trer schibettas empau tschessaus. En scadin cass attrai igl usit neutier dabia glieud, hosps e persunas da derivonza da Danis e Tavanasa che viva ordvart. Ina buna pusseivladad da sescuntrar e da schar reviver regurdientschas dallas atgnas schibettas ellustria sil plaz. Per elavurar las schibettas ord il lenn digl ogn ein ils buobs da scola responsabels ed il quantum che sto vegnir elavuraus ei dètg considerabels e s’augmenta cun mintg’onn da scola. Sil plaz da fiasta ei stau endrizzau in pign luvratori nua ch’in e scadin ha saviu schar instruir els misteris dad elavurar schibetta. Ina purschida stada garegiada da pign e grond e ch’ha lubiu da prender a casa l’atgna schibetta.