Pi spert tgi Marcel Hirscher

DA GION NUTEGN STGIER / ANR

Las cursas dalla Coppa mundiala da skis 2018/19 totgan prest agl passo. A fegn vo la staschung da cursas er per Sandro Simonet, igl skiunz surmiran tgi appartigna agl cader naziunal B. Dumengia passada ò el cunzont persvas aint igl sagond percurs digl slalom cugl sagond migler taimp. Da preschaint ò li an Andorra aint igl territori da skis Grandvalira igl final dalla Coppa mundiala da skis. Sessour on alloura li an plessas teras igls campiunadis naziunals. Chegl vala er per igls sportists e las sportistas da Swiss Ski. Las Maestranzas naziunalas da ski alpin 2019 on li agl Stoos ed agl Hochybrig e chegl digls 18 anfignen igls 23 da mars. Dalla parteida a chella occurrenza aint igl cantun Sviz è er Sandro Simonet, igl skiunz da Casti. La sia fegnameira è da mussar cunzont aint igl slalom ena buna prestaziun, tiers la ferma concurrenza. Ultra da chegl less igl skiunz da 23 onns defender igl sies tetel da campiun svizzer ainten la cumbinaziun alpina, gudagnea avant en onn.

Anc mantga la constanza

Sa fatg en nom sen camp internaziunal veva Simonet igl 2012 tar l’Olimpiada da giuvenils ad Innsbruck. Lò veva el gudagnea igl slalom, la sia disciplina prefereida. Fatg veva igl Surmiran pero er anc dus medaglias da bronz e chegl aint igl slalom gigant ed ainten la cumbinaziun alpina. Graztga agls resultats excellents tar las cursas internas digl cader tecnic da Swiss Ski ò Simonet fatg part er agl team svizzer 2018/19 dalla Coppa mundiala da skis. Da menziunar è tgi igl skiunz da Casti totga siva digl 2016 agl cader naziunal da skis. Tgi el ò igl potenzial dad esser spert ò Simonet confirmo en pêr gedas chest anviern. Chegl tgi mantga ad el è anc la constanza, igl creir a sasez e la dre- tga tenuta mentala tgi dovra per esser svelt ainten dus percurs. Sa tgapescha tgi pigl skiunz dad 1,93 meters dovrigl er igl cletg basignevel per mussar dus bungs percurs.

Pi spert tgi Kristoffersen e Hirscher

Scu gio avant en onn tar igl slalom a Kranjska Gora (8avel post) ò Simonet er musso las sias qualitads dumengia passada tar la cursa an Slovenia. Partia è el cun la nomra 41 e scu 25avel sa qualifitgia pigl sagond percurs. Cun pudeir esser alla partenza digl sagond percurs scu 6avel ò Simonet er profito dallas relaziuns optimalas dalla pista, an cumparaziun tar igl amprem percurs cun la nomra 41. Aint igl sagond percurs è el alloura sto ena classa per sasez cun esser igl sagond pi spert da tots 30 participants. Simonet ò gia en taimp da 47.88 secundas ed angal igl victour dalla cursa ed amei d’equipa Ramon Zenhäusern è sto per passa ena secunda anc pi spert. Graztga agl sies bung taimp è igl skiunz da Casti, tgi stat a Savognin, sa migliuro ainten la rangaziun digl 25avel post segl 15avel plaz. Remarcabel è bagn tgi Simonet è sto aint igl sagond percurs digl slalom a Kranjska Gora per 93 tschentavels pi spert tgi Marcel Hirscher e per ena secunda a mez pi svelt tgi Henrik Kristoffersen, dus noms fitg ancunaschaints aint igl circus da skis.