Success per Flem-Surselva

(anr/abc) La davosa fin d’jamna ein buca mo ils sportists da cuorsa liunga stai en acziun ell’Engiadina. A Lai ei stau il Campiunadi grischun da patinadi artistic. Mintg’onn l’entschatta mars s’entaupan atletas ed atlets dil patinadi artistic al Campiunadi grischun. Quel ei mintgamai publicaus sco concurrenza aviarta era per participonts d’ordeifer. In grond diember da participontas e participonts ha profitau dalla caschun da sepresentar avon ina giuria critica, secapescha culla speronza da gudignar in dils tetels cantunals. Las pli pintgas participontas, naven dalla categoria culla secunda steila, tochen tier las grondas dalla categoria «Interbronze» ein sespruai da mussar la prestaziun pli optimala per la victoria ella categoria corrispundenta. Las participontas pli grondas tochen tier l’elita ein idas sil glatsch a Lai cull’ambiziun da gudignar il tetel da campiunessa grischuna 2019.

Dil Club da patinadi Flem-Surselva ein diesch patinunzas separticipadas a quella concurrenza grischuna. Sco quei ch’il club communichescha ein tuttas stadas ella fuorma perfetga. Siat dad ellas han contonschiu plazs sil podest, da quei treis igl emprem rang el livel corrispundent ed ina schizun il tetel da campiunessa grischuna. «In tal success san ins mo contonscher cun trenadras da patinadi artistic che s’engaschan fetg ed han in cert num», scrivan las responsablas dil club. Ella halla dil center da sport e da glatsch Prau la Selva a Flem s’engaschan Sylvia Wyss pil livel «sport popular», Elena Romanova per la sparta dil cader ed Irina Brunschwiler sco trenadra e coreografa. Ellas treis sesprovan da contonscher il meglier pusseivel cullas cundiziuns idealas ch’il Prau la Selva porscha.

Plinavon annunzia il Club da patinadi Flem ch’ins hagi caschun proximamein da seperschuader dallas prestaziuns e dallas habilitads dallas artistas dil glatsch. Il club festivescha uonn siu 30avel anniversari. Aposta per quei dat ei dumengia, ils 24 da mars 2019 il suentermiezgi allas 15.00 ina bellezia show sil glatsch cul tetel «Viadi tras il temps». Ils aspectaturs san seschar entusiasmar da tetels musicals dils davos 30 onns. Sillas aspectaturas ed ils aspectaturs pigns e gronds spetgan coreografias fascinontas, costums creativs e da colur, las coreografias attractivas, segls gagliards e piruettas che muentan las emoziuns. «Igl ei segir in eveniment per l’entira famiglia», annunzia il club da Flem. Sco culminaziun da quell’occurrenza san ils aspectaturs admirar la giuvna Olga Mikutina, ell’ei separticipada dacuort al Campiunadi mundial dils juniors a Zagreb. Mikutina, che vala sco fetg grond talent mundial, ei savens ella halla da patinadi a Flem, pertgei sia trenadra ei Elena Romanova. Ella trenescha il cader da prestaziun a Flem ed a Sogn Pieder (Feldkirch) el Vorarlberg.

Categoria 2 steilas, pli avanzadas: 1. Elina Hörler; 2. Soraya Albin; 4. Kim Goos.

Categoria 3 steilas, pli giuvnas: 1. Kiana Klebeck.

Categoria 3 steilas, pli avanzadas: 2. Cecile Goos.

Categoria Interbronz, pli avanzadas: 3. Giovanna Knobel; 4. Lorena Wyss; 5. Laisa Zollet.

Categoria bronz, pli avanzadas: campiunessa grischuna: 1. Chiara Clopath.