«Nies clima ei nossa veta»

da Martin Cabalzar

Cun in’ulteriura demonstraziun ch’ha liug questa sera a Cuera vul il moviment cauma pil clima render attents in’ulteriura gada alla brisanza dalla midada dil clima. Quei succeda cun in cortegi da velos el rom dil di da cauma internaziunal en favur dil clima. Cun quella demonstraziun sil velo duei vegnir insinuau ch’il velo ei, en cumparegliaziun culs ulteriurs mieds da transport, in’alternativa pli favoreivla per il clima. Gia el decuors dil schaner e fevrer ein pliras tschiens persunas pelegrinadas tras Cuera e tras ulteriurs marcaus svizzers per s’engaschar per mesiras pli severas ed efficientas encunter il scaldament dil clima e per render attents alla destrucziun digl ambient. La finamira da tut quellas demonstraziuns seigi d’augmentar la pressiun sin la politica e sin l’economia. La gronda part dils demonstrants deriva dalla scola cantunala ch’ei gest lundervi da tractar quella tematica en ina jamna da project. Els appelleschan denton a giuven e vegl da separticipar alla demonstraziun. Sper quella demonstraziun extraordinaria el Grischun vegn fatg caumas sigl entir mund per render attents alla problematica. Tenor indicaziuns dall’activista per la protecziun dil clima Greta Thunberg ch’ha evocau las acziuns da protesta sin facebook van oz en 98 tiaras ed en 1325 loghens persunas sin via per demonstrar en favur dil clima. La Quotidiana presenta las strategias da confederaziun e cantun.

Commentari e pagina 3