Victoria dubla pil cumponist Fortunat Frölich

Da Hans Huonder / anr

Fortunat Frölich (categoria chors d’affons e categoria chors mischedai) e David Lang (categoria chors virils) ein ils victurs dalla concurrenza da cumposiziuns digl emprem Festival da la chanzun rumantscha a Trun. Ils premis dil publicum van a Flavio Bundi (categoria chors d’affons), David Lang (categoria chors virils) e Gion Andrea Casanova (categoria chors mischedai). Il responsabel per quella concurrenza, Christoph Cajöri, ei fetg cuntents cun la participaziun sco era cun la gronda part dalla qualitad dallas cumposiziuns. La sonda suentermiezdi han treis chors ad hoc dirigi da Flavia Walder, Rilana Cadruvi, Clau Scherrer e Christoph Cajöri presentau mintgamai las quater meglieras cumposiziuns da mintga categoria: Per chor mischedau, chor viril e chor d’affons e giuvenils. Ord las biebein 30 cumposiziuns inoltradas haveva la giuria cun Karl Scheuber (Turitg), Max Aeberli (Jona) ed Elisabeth Fischer (Wohlenschwil) – tut persunas cun gronda experientscha ella direcziun da chors – giu tscharniu las quater meglieras da mintga categoria. Sco basa per las cumposiziuns ha Iso Camartin giu fatg ina selecziun da poesias. Il victur da mintga categoria ha obteniu 1500 francs, il secund 1000 francs ed il tierz 500 francs. Leutier mintgamai ina clav da cant. La concurrenza da cumposiziuns la sonda suentermiezdi ella halla plurivalenta ei vegnida embellida musicalmein dils Fränzlis da Tschlin.

Vuliu dar in stausch

Cun la concurrenza da cumposiziuns han ils organisaturs dil festival giu ina clara finamira. «Nus havein vuliu novas canzuns. Ei fuss segiramein surfatg da pretender ch’ei era vegniu lungurus ils davos onns ella tscharna da tocs musicals, mo bia era semplamein tradiziunal. Nus havein vuliu dar nova veta alla cumposiziun da canzuns romontschas. Ils cumponists drovan magari in stausch, in impuls», di Cajöri che diregia il Chor Ligia Grischa dapi rodund otg onns. Varga 30 cumposiziuns ein la finfinala vegnidas inoltradas: «Ei ha duvrau empau temps entochen ch’ei ha dau moviment, mo cumponists ein persunas sco politichers che spetgan bugen entochen il davos mument. Treis jamnas avon la fin d’annunzia havevel jeu aunc exact treis cumposiziuns en mia scaffa da brevs. Silsuenter ein las cumposiziuns denton arrivadas successivamein e la finfinala havein nus contonschiu in bi diember.»

Biebein 30 cumposiziuns

Quei grond diember da cumposiziuns taxescha Cajöri lu era per in grond success: «Nus havevan negin’experientscha cun ina tala concurrenza cheu ella Romontschia, silpli enconuschientschas da concurrenzas en auters lungatgs. Ch’ei ha la finfinala dau tontas cumposiziuns novas ei fetg legreivel.» Las cumposiziuns ein derivontas per ina tiarza da persunas romontschas che vivan el Grischun, ina tiarza da Romontschs ella Bassa ed ina tiarza da persunas da lieunga tudestga dalla Bassa. «Quei ei ina fetg interessanta constellaziun», puntuescha Cajöri. Pliras cumposiziuns derivan da cumponists bein enconuchents. La qualitad dallas lavurs ei differenta. «Denter quellas 30 cumposiziuns ein differentas canzuns da buna entochen fetg buna qualitad. Lu denton era semplas caussas», di Cajöri.

1. Fortunat Frölich «I vain prümavaira» cun text da Luisa Famos; 2. Stephan Hodel «Anemona alva» cun text da Vic Hendry; 3. Flavio Bundi «Mumma» cun text da Michel Maissen; 4. Cyrill Schürch «I vain prümavaira» cun text da Luisa Famos.

1. David Lang «E morts ei il poet» cun text da Gion Deplazes; 2. Isidor Lombriser «Il nausch vischin» cun text d’Alfons Tuor; 3. Markus Fricker «Ruinaulta» cun text da Lothar Deplazes; 4. Rico Peterelli «Saleid allas alps» cun text d’Andreia Steier.

1. Fortunat Frölich «Nots» cun text da Ruth Plouda; 2. Isidor Lombriser «Tgisà» cun text da Mario Capaul; 3. Gion Andrea Casanova «Aurora» cun text d’Arnold Spescha; 4. Albert Spescha «Ei pluschigna» cun text d’Arnold Spescha.

Flavio Bundi (categoria chors d’affons), David Lang (categoria chors virils) e Gion Andrea Casanova (categoria chors mischedai).

Ils 12 tocs ein da cattar proximamein sin la homepage www.chanzunrumantscha.ch