Christoph Irniger cun Pilgrim

(anr/ac) Il quintet Pilgrim seformaus entuorn il saxofonist Christoph Irniger ei sesviluppaus el decuors dils onns vargai ad in impurtont representant dalla scena giuvna dil jazz europeic. Suenter lur ludeivel album «Italian Circus Story» presenta la formaziun actualmein il tierz album titulaus cun «Big Wheel». Cun quellas intonaziuns demonstrescha Pilgrim in impressiunont art tonal, bein improvisaus cun dabia spazi per spontanitad. La gruppa muossa ina moda e maniera da giugar che sto cuntinuadamein secumprovar e sesviluppar, sco getg, la gronda roda, The Big Wheel. Ils tschun musicists derivan da differentas parts dalla Svizra ed ein s’uni avon nov onns ella formaziun Pilgrim ed ein da casa en differentas ulteriuras formaziuns sin igl entir globus. La gronda roda da Pilgrim sepresenta mesjamna proxima sin la tribuna dil Cinema Sil Plaz. Il davos arranschament enteifer il festival Jazz sil Plaz.

Tgi che vul buca munchentar in dils empemettents musicists da jazz en Svizra e sia band po reservar in plaz pil concert dils 20 da mars allas 20.15 via cinemasilplaz.ch