Nua che Gion Gialet 
e Tredeschin èn s’inscuntrads

(cp) La Lia Rumantscha (LR) ha gì grond plaschair da contribuir a l’emprim Festival da la chanzun rumantscha ch’ha gì lieu la fin d’emna passada a Trun. Bleras visitadras e blers visitaders èn era s’interessads per la maisa da cudeschs da la LR ed èn sa participads a la concurrenza davart Gion Gialet e Tredeschin. Per las participantas ed ils participants n’èsi betg stà in problem d’eruir che quels dus eroxs rumantschs èn omadus viagiads en Frantscha. Gion Gialet va a Paris en ina chanzun sursilvana, e Tredeschin tschertga en ina paraula engiadinaisa sia fortuna tar il retg Ludovic en Frantscha.

La sort ha decidì tgeninas famiglias che dastgan viagiar gratuitamain al Di da famiglia ils 4 d’avust al festival «100 onns Lia Rumantscha» a Zuoz: Angela Nay, Vella, Sarah-Lea Schmed, Breil ed Amanda Cavelti, Sagogn. Il viadi a la Festa da 100 onns ils 17 d’avust al festival «100 onns Lia Rumantscha» a Zuoz han gudagnà: Elias Kleber, Amtzell (Germania), David Tiri, Trun e Marina Bearth, Laax.