Dils pigns acts criminals dalla lètg

(anr/ac) René Schnoz e Franca Basoli ein da veser gievgia proxima sin la tribuna dil Cinema Sil Plaz a Glion el toc «Kleine Eheverbrechen». El, Simon, ha piars sia memoria entras in accident. Sia dunna Lisa tuorna cun el en la habitaziun communabla. Simon e Luisa ein maridai dapi 15 onns, denton seregorda Simon da nuot. Ei Lisa insumma sia dunna, ei quei sia habitaziun, mo tgi eis el sez? Cun stenta sesprova Simon da reconstruir sia veta. Inquietaus e cun divertiment teidla el las explicaziuns da sia dunna Lisa che segna in bellezia portret da lur veta communabla, da lur carezia. Tgei denton sche las explicaziuns da Lisa constattan buc, sch’ella gi manzegnas? Eis el, Simon, propi aschia sco sia dunna descriva? Igl autur Eric-Emmanuel Schmitt ei sefatschentaus cun ina tematica ch’ha gia inspirau numerus scribents e scribentas. Piarder la regurdientscha e tschercar ina nova identificaziun. Tier Simon e Lisa eis ei la dunna ch’inventa igl agen um da niev, scaffescha in partenari sco ella ha gia adina giavischau. «Kleine Eheverbrechen» senumna il toc e las rollas vegnan giugadas da Franca Basoli e René Schnoz. Els celebreschan sin tribuna il cumbat denter um e dunna enteifer ina instituziun che senumna lètg.

Ina reuniun cun divers pigns acts

criminals da veser gievgia,

ils 21 da mars allas 20.15 sin la tribuna

dil Cinema Sil Plaz. Reservaziuns via

cinemasilplaz.ch