In bi success per la fin

(anr/hh) La squadra cun juniors F da plirs clubs dalla Surselva ha contonschiu il secund rang al turnier da ballapei en halla a Wattwil. Cun quei terminescha ella ina buna stagiun d’unviern. La fin dall’jamna vargada ha il Club da ballapei Wattwil Bunt 1929 organisau per la 11avla ga il turnier da ballapei per equipas da juniors en halla a Wattwil. La squadra dils juniors F dalla Surselva ei serendida a quei turnier cun l’ambiziun da contonscher in bien rang. Quei ei la finfinala era reussiu all’equipa dil trenader Jan Jascur. Per la fin dil turnier ei resultau il bien secund plaz. Cun quei termineschan ils juniors F la stagiun d’unviern cun in’ulteriura buna rangaziun. Dils sis turniers che l’equipa cun juniors F da Danis-Tavanasa, Trun/Rabius e Laax ha absolviu quest unviern ha ella gudignau treis. Ina ga ei reussiu il secund plaz ed ina ga il tierz rang. Sulettamein en in turnier ha la squadra munchentau mo per pauc la qualificaziun pils giugs finals.