Kathrin Rüegg – 
la scriptura ch’ha vendì sis milliuns cudeschs

Doris Schmid ubain Kathrin Rüegg sco ella aveva num cun il num dad artista è ina enconuschenta scriptura svizra. Ella ha scrit 45 cudeschs e moderà 350 emissiuns en il Südwestrundfunk SWR. L’onn 2011 è Kathrin Rüegg morta en la vegliadetgna da 81 onns. Ils dus mez fragliuns Julia Schlanser e Luzius Schmid han elavurà la biografia da Kathrin Rüegg e laschà producir in cudesch surlonder. Julia Schlanser e Luzius Schmid èn ils uffants ord segunda letg dal bab da Kahrin Rüegg. Kathrin Rüegg è naschida l’onn 1930 ad Arosa ed ha passentà là ils emprims 12 onns da l’uffanza. Suenter ch’ils geniturs han laschà sparter ha ella vivì pli u main a Basilea. Là ha ella fatg gia en giuvens onns ina gronda carriera professiunala. L’onn 1971 è ella sa chasada en il Tessin nua ch’ella ha entschet a scriver cudeschs. Entras in giast da vacanzas, Werner O. Feisst, è ella vegnida tar la televisiun. L’onn 2011 è Kathrin Rüegg morta en la chasa da vegls a Gordola.

In bun menu e vitiers in bun vin e per finir arriva era ina clocca aua sin maisa. Ma qua datti differenzas: Tar in bun vin cotschen èsi meglier da baiver aua senza gas, percunter gusta il vin alv meglier cun dasper aua cun gas. Claudia Vontobel da Scuol è someliera d’aua. Ella abita dapi trais onns a Scuol. Gist en ils conturns datti differentas auas mineralas, quai ha fascinà ella. Perquai ha ella fatg differents curs per daventar someliera. La finamira da Vontobel è da sensibilisar la populaziun per quest stgazi d’aua ch’exista en Engiadina Bassa.

Cura ch’ina aviun senza motor è crudà giu l’october 2017 en il Tschuggentälli sur Tavau era il pilot probablamain collidà avant cun il terren. La raschun exacta per la crudada na po la Sust betg eruir. Il pilot da 62 onns cun experientscha, ch’aveva sa laschà trair en l’aria da l’eroport da Bogn Ragaz anora, era mort tar l’accident. L’um purtava anc il paracrudader betg avert cura ch’ins al ha chattà mort. Il Servetsch svizzer d’inquisiziun da segirezza Sust suppona che l’aviun senza motor saja collidà cun il terren entant ch’el sa chattava anc en in sgol manà. La raschun per l’accident restia la finala dentant betg sclerì.

En media han las Viafiers federalas (VFF) transportà l’onn passà mintga di 1,25 milliuns passagiers. Quai è in plus da bunamain 1% cumpareglià cun l’onn avant. Il resultat da concern saja s’augmentà per passa 42% sin 568 milliuns francs. Quai han communitgà las VFF. Betg cuntentà ha però la punctualitad. Las Viafiers federalas han transportà l’onn passà dapli passagiers. En media han ellas transportà mintga di 1,25 milliuns passagiers. Quai è in plus da 0,8% cumpareglià cun l’onn avant. En tut han las VFF vendì 107 milliuns bigliets. Ina gronda part da quels sajan vegnids vendids sur chanals digitals. Las cumpras digitalas sajan creschidas il 2018 per 37% cumpareglià cun l’onn avant. Percunter sajan las cumpras al spurtegl e vi dad automats idas enavos. Tenor communicaziun da las VFF è il resultat da concern s’augmentà per passa 42% sin 568 milliuns francs. Ina raschun per quai saja stà il program d’effizienza «Railfit20/30». Cun quel sajan ils custs d’administraziun vegnids sbassads e la productivitad vegnida augmentada tar il traffic da persunas e vitgira sco er tar l’infrastructura. Suenter cifras ferm cotschnas il 2017 èsi er reussì a VFF Cargo da scriver in gudogn da 12,9 milliuns francs per l’onn passà. La situaziun restia dentant tendida per VFF Cargo cunquai che l’interpresa na survegnia davent dal 2019 betg pli subvenziuns. Er ils clients duajan profitar da quest resultat. Tranter auter vulan las VFF offrir dapli bigliets da spargn. Previs èsi da vender il 2019 bigliets da spargn per 100 milliuns francs. Gia l’onn passà han las VFF pudì impunder 80 milliuns francs dal gudogn per bigliets da spargn. Quai èn stads 30 milliuns dapli che planisà. Tut en tut han las VFF vendì l’onn passà tschintg milliuns bigliets da spargn. Betg cuntentà haja però la punctualitad dals trens. Quai cunzunt en il Tessin e la Svizra franzosa, ma er tranter Turitg e Berna. Raschun per ils retards sajan tranter auter stadas lavurs da mantegniment en cumbinaziun cun l’extensiun da l’infrastructura. Quests plazzals hajan chaschunà bleras interrupziuns da lingias. Ultra da quai èn er ils disturbis tar ils novs trens Dosto da Bombardier stads responsabels per retards. Uleriuras raschuns per retards èn stads disturbis tecnics vi da locomotivas u guntgidas, retards or da l’exteriur ed accidents da persunas.

La Chadaina da fortuna organisescha ils 28 da mars in’acziun da solidaritad per las unfrendas da la guerra en il Jemen. Cun ils daners sustegna ella las ovras d’agid partenarias che gida a la populaziun civila al lieu. Quella patescha surtut da mancanza da provediment medicinal e mangiativas. La Chadaina da fortuna metta gia avant il di da solidaritad a disposiziun in milliun francs per agid d’urgenza a las unfrendas da la guerra en il Jemen. En il pajais arab regia dapi quatter onns ina guerra civila. La situaziun umanitara saja fitg precara, scriva l’organisaziun d’agid. Cunquai che be anc la mesadad dals ospitals èn en funcziun tgiran las organisaziuns partenarias blessads en centers da sanadad u en tendas en la vischinanza dals territoris da conflict. Uschia èsi pussaivel da gidar pli svelt. Las organisaziuns gidan er dunnas en speranza e var 1,8 milliuns uffants che pateschan dad alimentaziun manglusa. Tenor l’autcumissariat da las Naziuns Unidas per ils fugitivs UNHCR èn bunamain quatter milliuns persunas en fugia. Radund 24 milliuns umans dovrian agid umanitar. Donaziuns per il Jemen pon gia vegnir fatgas immediat. Quai online u via conto da posta.

Enstagl da la «Zentralschweiz am Sonntag» e da la gasetta electronica «Ostschweiz am Sonntag» datti dapli en las ediziuns da la sonda da las duas gasettas «Luzerner Zeitung» e «St. Galler Tagblatt». Quellas vegnan lura ad avair num «Schweiz am Wochenende». Cun stritgar las ediziuns da la dumengia spetga l’interpresa CH Media da pudair spargnar. En las redacziuns da la Svizra centrala e da la Svizra orientala van circa diesch plazzas da lavur cumplainas a perder. Tenor atgnas indicaziuns reagescha l’interpresa uschia sin adina damain entradas tar ils inserats. Ils abunents survegnan davent dal fanadur la sonda la «Schweiz am Wochenende», mintgamai cun parts regiunalisadas. Cun il medem titel edescha CH Media gia dapi il mars 2017 ina ediziun per la regiun da la Svizra dal nordvest. L’ediziun totala da la «Schweiz am Wochenende» vegn da nov a dumbrar 350 000 exemplars.

Cura che dretgiras svizras han sentenzià dschihadists esters duain las autoritads pudair expulsar quels en lur pajais d’origin. Quai era sch’ils sentenziads ston quintar cun tortura u cun auters tractaments brutals ed inumans. Suenter il cussegl naziunal ha er il cussegl dals chantuns sustegnì questa proposta cun 22 cunter 18 vuschs ed ina abstenziun, quai cunter la veglia da sia cumissiun. La proposta vegn dal cusseglier cristiandemocrat Fabio Regazzi dal Tessin. La pledadra da la cumissiun Pascale Bruderer ha discurrì d’in dilemma. Terrorists sentenziads che restian en Svizra suenter avair sesì giu lur chasti sajan in privel potenzial per la publicitad. Sche la Svizra tramettia dentant enavos quels, alura cuntrafetschia ella a reglas internaziunalas. E la Svizra pudessia uschia era daventar cumplizi d’in stadi che tortureschia.

Il parlament federal è sa cunvegnì ad ina refurma da las prestaziuns supplementaras. Suenter il cussegl dals chantuns ha er il cussegl naziunal approvà las propostas da la conferenza d’intermediaziun. I sa tracta dad in cumpromiss: Tgi ch’ha ina facultad da passa 100 000 francs n’ha en l’avegnir nagin dretg sin prestaziuns supplementaras. Tar pèrs maridads munta la summa a 200 000 francs. Proprietad d’abitar per l’agen diever na vegn latiers betg resguardada. Sch’i dat in referendum cunter la refurma da las prestaziuns supplementaras n’è anc betg cler.

Il cussegl naziunal ha approvà ina moziun dal cusseglier vallesan Mathias Reynard da la ps cun 93 cunter 68 vuschs ed 11 abstenziuns. Il davos studi pli grond davart mulesta sexuala al plaz da lavur saja vegnì publitgà avant pli che 10 onns, ha argumentà Reynard. Il cussegl federal va d’accord cun l’incumbensa. Sulet ina part da la Partida populara e dals liberals ha refusà l’incumbensa da far in tal rapport. Sia partida na veglia betg bagatellisar la tematica, ha ditg Verena Herzog da la pps. Dentant sa fatschentian gia divers posts cun il problem. La dumonda per in rapport davart mulesta sexuala va uss en il cussegl dals chantuns.

Ulteriura victoria per Nino Schurter al Cape Epic en l’Africa dal sid. Il duo cun Schurter e Lars Forster ha er gudagnà la segunda etappa da questa cursa d’in’emna en la regiun da Kapstadt. Suenter il prolog e las emprimas duas da set etappas mainan ils dus Svizzers il classament cun in avantatg da quatter minutas sin il Tudestg Manuel Fumic che parta ensemen cun il Brasilian Henrique Avancini.

Il Cape Epic vala sco la pli dira cursa da mountainbike sur pliras etappas. Avant dus onns aveva Schurter gia triumfà a questa cursa ensemen cun Matthias Stirnemann.