Catto en schef pigl ressort pistola

DA GION NUTEGN STGIER / ANR

Surmeir totga da nov alla cumischung da teir 4/20. Anfignen la premaveira 2021 on tots igls stands da teir d’aveir sano igls tschiffaballas. Da nov alla suprastanza districtuala appartigna Michael Klein tgi surpeglia igl resort pistola. Alla radunanza da delegos, tgi ò gia li a Surava, ò Leonhard Gruber, igl president digl District da teir Alvra/Surses, benevento dasper igls 25 delegos er anc varsaquants giasts. Chegl èn colonel Jöri Kaufmann, igl uffizier da teir federal, igl nov uffizier da teir regiunal major Corsin Spiller e major Filip Dosch scu commember dalla cumischung da teir digl Grischun central. All’antschatta dalla radunanza da delegos èn igls preschaints sa regurdos ad Ueli Lorenz da Lantsch tgi è betg ple tranter nous ed è sto en tiradour passiuno.

La Festa da teir 
cantunala

Aint igl center dalla staschung da teir digl 2018 seia stada la Festa da teir cantunala an Surselva cun vers 8000 tiradours, ò menziuno Gruber. Plaschevel seia tgi an Surmeir seia la participaziun agl Teir campester 2018 betg sa redutgeida. Persiva vegian igls tiradours adegna pi pac interess pigl teir districtual, chegl tgi seia bagn donn. Gia li ò igl curs da teir per giovens angal an Val Alvra cun mantger an Surses igl interess. Bel seia tgi fatg chel curs vegian 16 mats, ò menziuno Gruber. Domino las occurrenzas da teir digls giovens on igls tiradours da Barvogn tgi on er gia success sen camp cantunal e surregiunal. Menziuno ò igl president digl District da teir Alvra/Surses tgi igl Teir campester 2019 alla fegn da matg vegia li a Crappa Naira, Rona ed a Cunter.

Nov uffizier da teir

Sa preschento agls preschaints è er Corsin Spiller, igl nov uffizier da teir per la cumischung da teir 4/20. Siva dall’antschatta schaner 2019 totgan las uniuns da teir da Surmeir a chella cumischung da teir. Da nov dattigl ossa angal ple tschintg regiuns da teir anstagl seis regiuns. Cun excepziun dall’Uniun da teir Mot segna major Filip Dosch per la survigilaziun e cunsegliaziun dallas otras uniuns da teir dalla nossa regiun.

Cumegns ed uniuns
ston sanar

Anfignen da premaveira 2021 ston igls cumegns e las uniuns da teir sanar igls tschiffaballas e cunzont dismetter igl plom tgi sa catta aint igl taratsch davos las schebas. Chella sanaziun è cumbinada cun pulits costs, vign dantant sustigneida dalla confederaziun, digl cantun ed er digl Uffezi cantunal da sport. Da far chella sanaziun ins ò anc agl stand da teir a Rona ed a Barvogn. Igl stand da teir da pistolas ed armas da sport a Cunter, chel vign integro aint igl stand da teir a Rona, mademamaintg er chel da Tinizong. Da dismetter igl plom ins ò pero er an chels dus lis ed er tar igls anteriours stands da teir tgi dat gio pi dei betg ple. Per dismetter chel plom aint igl taratsch è da chintar cun costs da 150 000 francs per stand. Digl reminent, aint igl Grischun èn sanos anfignen oz 109 da 147 stands da teir ed igls oters ins sto anc sanar, perchegl tgi schiglio è do an dus onns igl davos schoz.

En fatg plaschevel

Siva dalla mort da Fredi Krüger da Savognin igl schaner 2016 ò mantgea ainten la suprastanza digl District da teir Alvra/Surses la persunga tgi stava alla testa digl resort pistola. Fatg chegl parzial ò Heinz Kündig da Lantsch, dantant betg scu commember uffizial dalla suprastanza dall’organisaziun da teir regiunala. Ossa è sto pussebel da cattar cun Michael Klein da Tinizong en tiradour tgi surpeglia igl ressort pistola. El è en tiradour activ e chegl sen la distanza da 300 meters scu er sen las distanzas curtas. Da professiun è el inschignier e lavoura a Turitg e parzialmaintg er a Savognin. Igl nov manader dalla partiziun pistola è commember dall’Uniun da teir Sotgôt. Igl è bagn en fatg plaschevel tgi è sto pussebel da cattar cun Klein ena persunga tgi ò surpiglia chel mandat. Confirmada scu revisoura è neida Cornelia Brenn-Collet da Savognin. Da nov revisour è Flavio Gruber da Farrera tgi ramplazza Erich Schmid da Barvogn.