«Drone Prix» sil Crap Sogn Gion

(anr/abc) Igl atun vargau ha quell’occurrenza attratg mellis aspectaturs al Lag da Turitg. Questa primavera ei la medema a Laax. Ils organisaturs dil campiunadi «Drone Champions League» spetgan dils 28 tochen ils 30 da mars pign e grond sil Crap Sogn Gion. Igl ei ina nova disciplina sportiva, ina cuorsa nua ch’ei va per spertadad, inschign, reacziun. Tut cumbinau cun bia «rueida» e musica. Igl ei la formula 1, buca quella dils automobils, mobein dallas dronas. Igl atun vargau ei la «Drone Champions League» stada per l’emprema gada en Svizra. Miez october 2018 a Rapperswil han varga 10 000 visitaders seschau fascinar da quella nova attracziun sportiva.

Gia lu havevan ils organisaturs empermess ch’ei detti ina cuorsa en in territori da skis. Laax ei staus predestinaus sco liug dil 2. Drone Grand Prix en Svizra. La fin d’jamna dils 28 tochen ils 30 da mars ei quei campiunadi el parc da siglir sil Crap Sogn Gion. «Ina resonanza extrem positiva ha l’occurrenza giu al Lag da Turitg», scrivan ils organisaturs dalla «Drone Champions League». Quella resonanza vulan els experimentar uss era en in dils pli renomai territoris da skis dil mund.

La cuorsa da dronas el parc da siglir, il «snowpark», emetta la televisiun direct en 100 tiaras, e secapescha san ins suandar quei che schabegia sin 2200 m s.m. era online, direct sil telefonin ni tablet. Las dronas han giugadurs respectiv pilots da manevrar e tgamunar tras in parcours. 160 kilometers l’ura ei standard. Ils pilots ein confruntai sil Crap Sogn Gion cun cundiziuns climaticas ch’ein forsa buca d’avantatg. Buffs dil vent burasclus engrevgieschan da navigar ina drona.

Cuorsas internaziunalas da dronas dat ei dapi treis onns. Mintga stagiun sefuorman ils megliers pilots dil mund, ei dat otg squadras da cuorsa cun glieud digl entir mund. Quels pilots separticipeschan – sco tier las cuorsas dalla F1 dils automobils – a sis cuorsas da dronas sin tuts continents.