39 ons ingaschamaint a favur da la forza electrica

(anr/afi) Ils delegats da la Corporaziun Energia Engiadina han approvà d’incuort tuot las tractandas ed elet ün nouv president. Ils preschaints sun gnüts infuormats davart la situaziun actuala sül marchà d’energia e dals fits d’aua. Venderdi passà s’han radunats passa 20 delegats ed ulteriurs giasts a Susch per salvar la radunanza da la Corporaziun Energia Engiadina (CEE). Preschaint d’eira eir l’anteriur cusglier guvernativ Reto Mengiardi. El ha dat in seis referat ün sguard i’l passà e co cha l’atmosfera e la vita in l’Engiadina Bassa s’ha sviluppada dürant ils ultims 60 ons. Il rapport annual da la CEE ha dat ün’invista in l’andamaint da la gestiun. Las contribuziuns our dal fondo dals tschinch pertschient importa per l’on 2019 passa 485 000 francs.

Da la giunta 
al presidi

Avant 39 ons d’eira Not Carl entrà illa giunta da la Cumünanza dals cumüns concessiunaris da las Ouvras Electricas d’Engiadina (OEE). Da l’on 1986 es el lura gnü elet sco president da quist gremi. Dürant quist temp s’ha ingaschà Carl tanter oter pel mantegnimaint dals fits d’aua ed ha cumbattü per metter suot terra la lingia d’Engiadina da 16 000 kilovolts. Cun quai ha’l procurà cha tanter S-chanf e Martina sun gnüdas demontadas passa 1450 püttas da lain. Plünavant ha la CEE sustgnü daspö l’introducziun dal fondo dals tschinch perschients la cultura e la vita sociala illa regiun cun passa 12 milliuns francs. «In Grischun nu daja ingüna regiun chi po sustgnair la cultura in quista fuorma», ha infuormà Carl. El ha manzunà cha las trattativas culs concerns d’energia sajan gnüdas i’ls ultims ons adüna plü difficilas. «I’s bada cha dapertuot vegna spargnà.» Ün tema chi gnarà actual i’ls prossems ons sarà la scadenza da las concessiuns. «Quellas scrodan in 25 ons ed eu racumond da cumanzar per temp cullas preparaziuns bsögnaivlas.»

Müller segua a Carl

Ils delegats han elet unanimamaing ad Emil Müller, il president cumünal da Zernez, sco nouv president da la CEE. «Eu n’ha respet da surtour quista carica da meis antecessur. El lascha inavo gronds fastizis», ha dit Müller. Carl resta però inavant collià cun la CEE, e quai sco cusgliader giuridic. La radunanza da delegats ha elet ad Aita Zanetti da Sent illa suprastanza ed ha approvà il reglamaint nouv davart las contribuziuns our dal fondo dals tschinch pertschient dals fits d’aua. Ils preschaints sun gnüts infuormats davart la situaziun actuala in connex culla procedura da las OEE cunter ils cumüns concessiunaris davant l’ELCom e’l Güdisch administrativ federal. L’ELCom vaiva dat radschun l’utuon passà a las OEE e cun quai decis cha l’EE Energia Engiadina haja da pajar a l’OEE ün’indemnisaziun da transport per l’energia chi vain furnida da terzs. A basa d’analisas ha la CEE decis da recuorrer cunter quista decisiun pro’l Güdisch administrativ federal.

Cumbats i’ls differents secturs

Sün iniziativa da la CEE es gnüda fundada da l’on 2012 la cumünanza d’interess dals cumüns concessiunaris dal Grischun, l’uschenomnada IBK. La IBK s’ha pudü as profilar illa Svizra ed illa defaisa pel fits d’aua. Il resultat da quist ingaschamaint es stat cha’l Cussagl naziunal ha decis da mantgnair il predsch pels fits d’aua actual fin da l’on 2024. Ils ultims ons s’ha ingaschà Carl eir in chosa da l’energia supplementara per Samignun. «Tenor la concessiun han ils cumüns concessiunaris sco eir ils consüments da forza electrica in Samignun il dret da retrar energia supplementara», ha’l infuormà. Intant ha il cumün da Samignun decis da spettar al resultat da la procedura da la CEE davant l’ELCom. «Quist pass nun es uschè inclegiantaivel, siond cha Samignun pudess profitar fingià hoz da la furniziun previssa d’energia supplementara sur nossa corporaziun.» Quai eir pervi cha’l predsch da forza s’ha recreà dürant ils ultims ons «ed importa pel mumaint intuorn set raps pro urakilowatt». L’energia supplementara chi vain retratta da las OEE cuostess actualmaing ses raps pro urakilowatt. «Siond cha nus vain svessa ün interess vi dal dret da retrar quist’energia per Samignun, vulaina prochatschar quista chosa davant güdisch, e quai cul plont chi d’eira fingià gnü preparà da l’on 2015.»