Tgi è igl vaschign da Theresa May?

(pb) Strousch en’otra persunga è stada igl davos taimp schi ferm aint igl focus dallas medias scu Theresa May. Atgnamaintg ins pudess aveir cumpassiun cun ella. Schi ferm è ella s’angascheda per en Brexit ordino per survagneir alla finala tuttegna ena veira tarada digl agen parlamaint. Ma nous ans interessagn oz betg per ella, mabagn per igl sies vaschign. Nous managiagn er betg igl sies vaschign ainten la residenza dalla regenza alla Downing Street nr. 10 a Londra. Er betg igl igl sies vaschign a Sonning 60 km davent da Londra dasperas la Themse noua tgi Theresa May stat privat. Ena vischnanca tgi vala scu li digl idil engles. Ea, igl noss interess sa concentrescha sen chel om tgi vasagn da sia vart sanestra aint igl parlamaint britannic. Chel tgi è tschanto lò davos sen quasi mintga fotografia ainten las medias e sen quasi mintga rapportascha da televisiun or digl parlamaint. Chel om tgi è igl ple quiet e commentescha las expectoraziuns dalla ministra presidenta digl imperi royal britannic angal cun muantar lev igl lefs, cun en surrerir u cun far chegl tgi el fò igl pi gugent: dar digl tgea. Rarissem è el emoziunal. Ed el vign ossa tar ena preschientscha mediala enorma. E chegl atgnamaintg sainza leir. Ma dad el vign strousch discurria en pled. Mai ins ligia igl sies nom. Er betg ainten ena legenda dasperas ena fotografia tgi el è da veir dasperas momentan franc la pi ancunaschainta donna digl mond. Ma er schi nign discorra dad el. Nous lagn far chegl. Angal dad el. Pertge alla finala è el ena persunga tragica dad esser schi preschaint e strousch ensatgi so tgi tgi chest om è!

Ena tschertga betg schi simpla

Ins dastga an mintga cass supponer tgi i sa tracta dad ena persunga impurtanta, schi ella dastga piglier plaz aint igl paralmaint dasperas la ministra presidenta. Ma scu saveir tgi tgi el è e tge funcziun tgi el ò schi ins vei adegna angal igl sies maletg e mai navot oter.

Ossa è sa dada la dumonda, scu savessans neir sessour tge persunga tgi chegl è. Ella tgi è quasi la sumbreiva da May?

Bung, oz dattigl pussebladads tecnicas tgi ans son sustigneir tar talas tschertgas. Per exaimpel igl internet e lò porscha Google igls sies bungs sarvetschs. Ma per la tschertga ins stò inditgier ensatge concret per tgi el saptga tschartger. Ma igl nom dalla nossa persunga na savainsa betg. Bung, ensatgi tgi dastga seser dasperas la ministra presidenta stuess bagn esser ena persunga or digl sies conturn politic. I pudess esser ensatgi or digl sies cabinet, ma pudess er esser en funcziunari pi ot.

Nous ischan ias vedlonder cun sistem. I va supponia tgi sa tracta an mintga cass dad en parlamentari. Ed i vagn er dastgea supponer tgi seia egn dalla parteida da May. Damais en conservativ. Ma parlamentaris conservativs dattigl betg manc da 314. Damais betg gist schi simpel.

Aint igl internet dattigl er tantas diversas apps. Chellas ans son gidar ainten las pi diversas direcziuns. Egna tranter chellas bleras ò la habilitad da canoscher persungas resp. fatschas. Ma per tgi chesta app saptga canoscher la fatscha dad ensatgi stò ella aveir registro chella ensacuras e chegl an relaziun cun igl nom. E chegl veva la nossa app betg.

Ossa, tge lainsa far? I dat navot oter tgi dad eir tras tot igls parlamentaris dalla House of Commons of the United Kingdom. E tar mintga nom è da cumparagler cun la fotografia e vurdar schi ella corresponda alla persunga tschartgeda. Damais ena lavour da pazienztga. Ma ischan ias vedlonder. E varda, gio siva la 5avla u 6avla amprova ans preschainta Google la persunga tschartgeda. Igl noss om tgi è sto da veir igl davos taimp schi bleras gedas dasperas May aint igl parlamaint. Chel om cun igl destign dad esser schi preschaint e tuttegna betg ancunaschia.

Philip Anthony Hammond

Uscheia sa cloma el cun igl nom antier. Pero numno adegna angal Philip Hammond. Ed el è betg angal ena marionetta aint igl antier sistem politic digl imperi britannic. Na, el è commember digl cabinet da May. Damais en commember dalla regenza. Schi vessan savia chegl fiss la tschertga stada bler pi simpla. Ma chegl ans era betg nia andamaint lez mument.

Ed ossa tgi savagn igl nom da chesta persunga ancunaschainta anfignen ossa angal antras la sia visualisaziun ans revelescha Google tot igls detagls da Hammond.

El è naschia igls 4 da december 1955 ainten l’ansagna digl tiradour ad Epping. Siva dad aveir frequento ena scola statala locala è el sa deditgia igl 1974 agl studi dalla filosofia e dalla politica all’ancunaschainta Universitad dad Oxford.

La sia veia politica ò antschet igl 1979 scu voluntari tar en cumbat electoral digls conservativs.

Igl 1994 ò el candido per en’elecziun supplementara ainten igl House of Commons, è pero betg nia elgia. Chegl è alloura gartagea igl 1997.

Siva digl 2010 totga el tigl cabinet. Igl amprem scu minister per traffic, siva scu minister da defeisa ed alloura zont scu minister digl exteriour. Igl 2016 ò May nomino el scu minister da finanzas aint igl sies cabinet.

Ossa savainsa tgi tgi chest om è!