«La disciplina è bler miglra 
tgi avant 20 onns»

DA GION NUTEGN STGIER/ANR

Radond 1500 confamigliars on gia interess da vurdar davos las culissas dalla scola da recrut d’infantareia 12. Cumandant da chella è colonel digl stab Daniel Steiner. Nous vagn accumpagnea el durant igl de, noua tgi paraints digls recruts on gia la caschung da vurdar ad els sur igls givis. La stad 2018 ò colonel digl stab Daniel Steiner da Savognin mano per l’amprema geda la scola da recrut d’infantareia 12 a Coira. Ossa èn gio passadas diesch emdas dalla sagonda scola da recrut tgi el magna scu cumandant. Per igls vers 800 recruts è la furmaziun e scolaziun generala siva diesch emdas a fegn. La recruta sezza chella cozza anc anfignen igls 17 da matg 2019. La scola da recrut cozza an tot 18 emdas. Chella digl anviern antscheva ainten la terza emda digl calender e vo a fegn ainten la 20avla emda digl calender. La scola da recrut da stad, chella vo digl zarcladour (emda 26) anfignen igl otgover (emda 43). Chegl tgi pertotga l’antschatta dalla scola da recrut da stad vegia la politica da cattar ena soluziun adattata per patrungs e per amprendists e students, manegia igl cumandant.

Nigna translocaziun ple

Cun pacas excepziuns restan igls recruts durant tot las 18 emdas a Coira, pertge chella schinumnada translocaziun (Verlegung) dattigl betg ple. Avant varsaquants onns geva la scola da recrut d’infantareia da Coira cun sies omens ainten las regiuns. Oz vo angal ple ena cumpagneia, da total quatter cumpagneias, per en curt taimp agl St. Luzisteig, er perveia digl sagettar. En oter muteiv tgi igls recruts restan a Coira durant l’antiera scola da recrut è er tgi dat betg ple igls plazs da teir da militer scu per exaimpel a Radons e sen Gelgia. La raschung principala è dantant tgi ena cumpagneia ò oz radond 200 recruts e suldos. Per metter chels sot tetg mantga ainten las vischnancas igl cutier adatto. Pi bod veva ena cumpagneia igl pi bler 120 omens e da cattar per chels cutier or ainten las regiuns era pi simpel tgi oz per mintgamai 200 dels per cumpagneia.

1600 recruts da total 18 000 recruts

Per onn vainsa an Svizra 18 000 recruts. Da chels pon angal 15% far lour sarvetsch da militer sainza interrupziun. Detg pi exact fon els 245 deis da fila militer e gio è lour carriera militara a fegn. Digls 18 000 omens ed en pêr donnas tgi fon la scola da recrut fon 1600 dels lour scolaziun e furmaziun da militer a Coira (recruta d’anviern e recruta da stad mintgamai radond 800 omens). Scolas da recrut d’infantareia dattigl an Svizra quatter ed egna da chellas è oramaias gio decennis ainten la capitala grischuna cugl cumandant actual, colonel dil stab Steiner.

Per tots en marsch da 50 km

Aint igl decurs dallas 18 emdas da recrut mantga sa tgapescha er betg l’emda da perseveranza (Durchhaltewoche), tg’ò gio decennis igls sies plaz tar la scolas da recrut d’infantareia ed er tar otras, punctuescha igl cumandant. El ò er detg tgi aint igl decurs dalla premaveira stetta segl program e chegl per mintgign en marsch da 50 km. Previa seia chel ainten la regiun das Tusang anfignen Coira. Da far chel marsch on er igls 70 recruts grischuns tgi absolvan la scola da recrut a Coira. Tranter els èn er 11 omens tgi dereivan da regiuns rumantschas, pero nigns da Surses, dei colonel digl stab Steiner. La gronda part digls 800 cumpogns tg’èn ossa suldos dereiva digls cantuns Appenzell, Glarunga, Son Giagl, Tessin, Turgovia eTuritg e naturalmaintg er da noss cantun. Digl domber total dad 800 recruts tgi fon igl mument lour scola da recrut a Coira èn 30% students. Dasper premsergents ed uffiziers ò igl cumandant colonel digl stab Steiner anc a disposiziun 40 omens (profis) tgi segnan per l’instrucziun e la scolaziun digls recruts.

Ansomma nign problem cun alcohol

Igl cumandant dalla scola da recrut d’infantareia a Coira loda an general la sia truppa. Gist chegl tgi pertotga la disciplina dat colonel digl stab Steiner bunas notas agls recruts. Cumparaglea cun la disciplina digls recruts avant 20 onns seia chella dad oz per en po pi exemplarica, accentuescha igl om da Savognin. Er areguard la tenuta vers uffiziers e superiours catta igl cumandant ple u manc angal bungs pleds. Problems perveia da mengia bler alcohol ins vegia strousch ainfra las quatter cumpagneias, punctuescha igl uffizier da pofessiun. Oz vegian igls recruts bagn ena relaziun pi persunala tar igls uffiziers e superiours e tuttegna mantga ansomma betg igl respect. Cun veiver ainten en mond dalla digitalisaziun vegia el ed er igls uffiziers magari d’intervigneir tar igls recruts, cun la supplica da betg metter online maletgs da mintga exercezi ed acziun. Bel seia tgi la tgapientscha persiva seia avant mang er schi vigna tuttegna tarmess ve e no maletgs sainza propi leir. Steiner dei tgi tar l’egn u l’oter recrut vegia el gia da far stidar fotografias segl telefonign per evitar tgi chellas vignan tarmessas ad otras persungas. Dall’otra vart resta pac oter tgi dad eir cugl taimp e chegl er tar ena scola da recrut, manegia igl Surmiran.

Ena truppa multiculturala

Igl interess pigl de digls paraints è sto immens gronda. Vers 1500 persungas èn stadas agl li per vurdar agls recruts sur igls givis agl Rossboden ed er aint igl areal dalla caserna a Coira. Alla fegn da chest’emda dattigl en ulteriour de per igls confamigliars digls recruts e suldos. Igl era en bel vurdar scu tgi las mammas cun faziel da tgea eran loschas sen lour fegls, scu tgi igls babs s’interessavan per l’arma da militer e scu tgi igl tat e la tatta sa legravan tgi igl beadi seia ossa en stagn e ferm suldo. Igls schinumnos secondos seian recruts plagn angaschamaint, fidos e versos, dei colonel digl stab Steiner. El punctuescha er tgi per chels monta far recrut e militer esser Svizzer. Igl cumandant ò alloura er piglia bler taimp per discorrer cun igls recruts e cunzont er cun lour confamigliars e sa musso ple tgi losch dalla sia truppa, an veir senn ena truppa multiculturala. Singulas cundiziuns vegia el bagn mess, dantant laschea agls uffiziers e recruts blera libertad tar igl antier program, ò menziuno Steiner.