La rolla dalla dunna ella Baselgia catolica

Davart quei tema actual e fetg discutau han l’Uniun catolica da dunnas dil Grischun ed il Cussegl pastoral chantunal arranschau sonda vargada ina dieta publica alla Scola aulta da teologia a Cuera. Varga 90 interessents – da quels treis quartas dunnas ed in quart umens – han nezegiau la caschun per seschar informar, tschentar damondas e formar in agen meini. Per tgi ch’ei vegnius ord igl entir cantun, ed ha unfriu in di persuenter, ha l’entira problematica buca saviu esser tuttina. Tschercar il discuors, brattar ora viceversa meinis ei segiramein ina megliera sligiaziun che sevilar surlunder e far pugn en sac.

Posiziun e spetgas dallas dunnas

Aviarta ei la dieta vegnida tras in referat fundau ed entelgeivel dad Eva-Maria Faber, professoressa per dogmatica e teologia fundamentala alla Scola aulta da teologia a Cuera. Che dunnas san buca ve-gnir ordinadas (spiritualas) ei buc in dogma dalla Baselgia, mobein ei sedau dad ina disposiziun (ordinaziun) dalla Baselgia avon melli onns. Quella ei adina puspei vegnida confirmada tras divers papas e concils. Era il papa dad ussa, Francestg, ni sa ni vul midar zatgei vid quella situaziun.

Alla dunna resta pia vinavon mo la rolla da survir ed ademplir impurtonts pensums che vegnan lubi ad ella oz dils umens. Decider da cuminonza ed agir communablamein tras um e dunna ei buca realisabel en quella situaziun. In pass pusseivel per midar quella fuss da sesarver per il diaconat. Persuenter ha Papa Francestg instituiu 2016 ina cumissiun che duei far propostas, co sligiar quei. Ch’ei vegn pretendiu pacienzia en quella Baselgia ei in fatg e che quella sa daventar ina «malpacienzia sontga» ei da capir.

Discuors al podi

Sut l’egida da Pierina Hassler, redactura dalla Somedia, han discutau ella secunda part digl avonmiezdi: prof. Faber, lic. teol. Iva Boutellier, representanta dall’Uniun svizra da dunnas catolicas, l’enconuschenta moderatura dalla televisiun, sora Ingrid Grave, Claustra da Glion, sur Marcus Flury, Glion, e Bernhard Bislin, Sagogn.

Boutellier ha schau passar revista sia via al studi da teologia e co ella ha empriu sco dunna da star tier e defender siu meini, era sch’ella ei savens vegnida criticada. Extrar dalla Baselgia dil papa ord protest ei negina sligiaziun, essend che cheutras semida la situaziun nuotzun e lai anavos quels che patratgan sco ins sez. Pli impurtont eis ei da cumbatter per ina midada interna.

Flury e Bislin han constatau ch’il temps semidi e deplorau che la Baselgia fetschi buc in pass. Els vesan negina raschun daco che dunnas sappien buca vegnir ordinadas e seigien aschia exclusas da bia.

Grave ha encuraschau las dunnas dad era ughegiar inagada enzatgei, d’annunziar il plaid da Diu sco quei ch’ellas han fatg ed ei vegniu praticau en Claustra a Glion, senza adina saver segir, sche la Baselgia lubeschi quei. Da donn eis ei stau ch’il vicari general per il Grischun, sur Andreas Fuchs, era buca presents, essend ch’ins vess intervegniu – per saver formar in meini – era la posiziun ufficiala dalla Baselgia.

Discussiun ed appel

Ella suandonta discussiun cul publicum ei vegniu deplorau che la collaboraziun denter spirituals e laics seigi vegnida onz mendra ils davos onns en certas pleivs e che l’efficienza dils cussegls parochials daventi dil meins. La dunna sesenti dad esser persula e consequentamein semuossien frustraziun e resignaziun. Biaras participontas giavischan denton ch’ina tala occurrenza sco a Cuera vegni adina puspei realisada per dar nova motivaziun.

El plaid final ha Mirjam Krebs, Landquart, appellau sco representanta dall’Uniun da dunnas catolicas el Grischun, ad umens e dunnas da s’engaschar da cuminonza per igl avegnir da nossa Baselgia catolica. René Hefti