Mirco Duff ha demissiunau

(anr/abc) Ils 19 da matg, a caschun dallas elecziuns federalas e cantunalas, dat ei ella vischnaunca da Ilanz/Glion aunc ina tractanda communala. Votantas e votants han d’eleger ina persuna che surpren in mandat el parlament communal. Sco quei ch’il biro parlamentar communichescha el davos «Fegl ufficial Surselva», ei l’elecziun necessaria pil temps restont dalla legislatura 2018–2021 naven digl 1. da fenadur 2019. D’eleger ei ina persuna che representa la fracziun da Glion. Quella persuna duei remplazzar Mirco Duff che ha demissiunau sils 30 da zercladur 2019. Igl advocat da 30 onns haveva annunziau a caschun dalla davosa sesida dil parlament communal ch’el seretili da siu post. El fa part dapi l’entschatta, vul dir dapi il matg 2013, dil parlament da Ilanz/Glion. Denter auter ha Duff fatg part dalla cumissiun redacziunala che ha lectorau e preparau tuttas leschas dalla vischnaunca nova fusiunada. Duront siu temps d’uffeci ei Duff s’engaschaus activamein el parlament cun incumbensas ed interpellaziuns per mauns dalla suprastonza communala. Candidaturas per l’elecziun substitutiva dils 19 da matg all’urna san ins inoltrar a scret all’administraziun communala a Glion. Ils nums da tuttas interessentas ed interessents dalla fracziun Ilanz/Glion che vulan surprender quei post ella legislativa da Ilanz/Glion vegnan publicai sin ina gliesta che vegn repartida cul material da votar. Sco quei ch’il biro parlamentar communichescha vinavon, ve-gnan las candidaturas publicadas ad uras el «Fegl ufficial».