Agüd voluntari per salvar vitas

DAD ANNATINA FILLI / ANR

In Grischun sun gnüts clomats ils «First Responders» daspö l’on 2015 pro bundant 50 cas d’urgenza. Quista prestaziun segua da voluntaris e nu vain surtutta da las chaschas d’amalats. «First Responders» o prüms respuondaders sun salvaders, chi frequaintan regularmaing la scolaziun bsögnaivla i’l sectur da la reanimaziun e chi rivan sco prüms al lö dal cas urgiaint. Da l’on 2013 es gnüda fundada a Lai la prüm’organisaziun dals «First responders» i’l Grischun. Actualmaing daja in tuot il chantun quatter da quistas organisaziuns. In Engiadina Bassa as vaiva a seis temp inizià l’acziun «Ün cour per la regiun» ed installà divers defibrillaturs illa regiun. Tenor Joachim Koppenberg, il directur dal Center da sandà Engiadina Bassa ed iniziant da l’acziun, mancan pel mumaint persunas chi füssan prontas da frequentar la scolaziun da l’organisaziun «First Responders». «I füss salüdaivel scha las societats da samaritans o ils pumpiers pudessan recrutar voluntaris chi s’ingaschesan sco prüms respuondaders», uschè il perit.

Pagina 7