«Alexei» turna an Russia

Oz e dumang ins ò la davosa pussebladad d’assister agl teater musical «Alexei» ainten la Clavadeira a Riom. Siva digl december ò igl Origen Festival Cultural preschento 14 gedas l’ovra cun cant, solt, rachint e musica.Igls davos 12 meis ò igl Origen Festival Cultural deditgia las sias producziuns alla Russia. Fatg ins ò chegl cun cant, solt, musica, teater, costums ed inscenaziuns singularas. La Russia ena tera cun ena cultura particulara ò anritgia ferm igl program digl davos onn e cunzont attratg en grond public. Cunzont las producziuns da solt cun en Sergei Polunin u er cun saltunzs e saltunzas digl teater Mariinski da St. Petersburg èn stadas la culminaziun digl onn deditgia alla Russia. Planget vo igl onn russ, cun producziuns ple u manc vandeidas or, a fegn. «Alexei», igl teater musical vign anc preschento oz e dumang allas 18.00 ainten la Clavadeira a Riom. En deletg cantic vignan alloura ad esser las grondas vespras da Sergei Rachmaninow, tgi igl Chor d’Origen canta seis gedas sen Gelgia, e chegl sot la direcziun da Clau Scherrer. Chellas vespras totgan tar egna dallas pi ancunaschaintas cumposiziuns digl musicist e cumponist russ. Ple u manc èn igls seis concerts vandias or.